Nytt liv i Vertshuset

Roy Lervåg satsar friskt og opnar i midten av november Smakifrå i lokala til Systrene Nilsen på kaien i Uskedalen.

Marius Tveit Nissestad

Marius Tveit Nissestad

marius@grenda.no

6 oktober, 2015

Mannen frå Ålesund har brei erfaring frå kjøkenbransjen. I følgje uskedalen.no har livet etter at han kom til Bergen for vel 20 år sidan handla mykje om mat og om det å finna fram til dei rette smakane. Han har dei siste åra vore å sjå i kokkeuniform på turisthotellet i Rosendal, men ønskjer no å satsa for seg sjølv. Matkonseptet han kallar Smakifrå, vil i byrjinga tilby catering og selskapslokale. Før han pyntar lokala til jul og inviterer bygdefolket til ulike juleaktivitetar.
– Ikkje så lenge etter opninga går vi inn i julesesongen. Då vil eg i helgane tilby forskjellige julerelaterte aktivitetar for bygdefolket og ulike bedrifter, seier Lervåg.
Kurs
Det var på kundefesten til Spar Uskedalen at Lervåg kunne informera dei frammøtte om at han kom til å satsa nytt i lokala til Systrene Nilsen. Og i bygget han no døyper Oska, etter elva i Uskedalen, ønskjer han òg å kunna trimma ganane til kommunen sine innbyggjarar med forskjellige kulinariske kurs.
– Etter nyttår planlegg eg fleire kulturelle aktivitetar som vin-, øl- og matkurs, samtidig som eg ønskjer å halde ope i helgene, seier han.