Zinus AS teikna viktig kontrakt i Danmark

Zinus AS høyrer heime på Rubbestadneset, men fleire kvinnheringar innehar viktige posisjonar: Endre Eidsvik er administrerande direktør, Ove Røssland er styreleiar og Bjørn Sturle Hillestad er sjef for sal og marknadsføring. Også Jan Jaap Boot, som tidlegare budde i Kvinnherad, jobbar i selskapet.

Zinus omtalar seg som «ein leiande leverandør av innovative landstraumløysingar». No kan bedrifta stolt kunngjera ein nyleg kontrakt med Skagen Hamn for levering av to stykk ZPP115 kabelhandteringssystem. Produkta skal leverast tidleg i 2025, og markerer nok ein milepåle for Zinus sitt aukande nærvær i Danmark.

– Vi er begeistra over å leggja til Skagen Hamn i vår stadig veksande liste over danske kundar, seier Klaus Kopelman, salssjef for landstraum, i ei pressemelding.

– Skagen Hamn er eit viktig knutepunkt i regionen, og tener eit svært breitt spekter av skip. Våre ZPP115-einingar vil gje hamna ei påliteleg og miljøvenleg straumløysing, som vil hjelpa dei med å redusera utslepp og skapa eit reinare hamnemiljø, legg han til.