Yrande engasjement for ryddeaksjonen

Kenneth Bruvik, initiativtakaren bak Rein Hardangerfjord, var i fyr og flamme på Skålakaien.

Eit breitt spekter av små og store, private og kommunale aktørar frå regionen er med på ryddeaksjonen, og det ser ut til at miljøaktivist Bruvik nyt å vera i sentrum av det som skjer.

– Eg er nok litt gal, men eg trur det er ein sunn galskap, sa han engasjert.

Men, som han passa på å understreka, han ville ikkje klart dette åleine.

– Eg er omgitt av gode folk! Her har eg med meg dei som er ansvarlege for koordineringa i sone 1 og 2, sa han og greip rundt skuldrene på Sveinung Toppe frå Bergen og omland Friluftsråd og Åge Valdal-Østensen frå Skjærgårdsservice.

No gjer vi det skikkeleg

Eit knepp lenger borte stod Jostein Eitrheim, dagleg leiar i Hardangerrådet, som lattermild fann fram telefonen sin.

– Dette seier noko om kor engasjert Kenneth er, slo oddingen fast.

Han ville visa at Kenneth Bruvik er blant dei fem personane han har hatt mest kontakt med på anropsloggen. Dei fire andre er familie.

– Det vart sagt at dette skulle vera verdas største ryddeaksjon, og det klarar vi faktisk no! Det har aldri tidlegare vore skipa i stand ein større ryddeaksjon nokon stad. 140 aksjonar er registrert, og ungdommen går framføre. Det gjev meg tru på framtida, dette er fantastisk! sa Eitrheim lett panegyrisk.

Han fann det høveleg å legga til at Rein Hardangerfjord er eit femårig prosjekt som Hardangerrådet gjorde einstemmig vedtak på å vera med på i alle fem åra.

– No gjer vi det skikkeleg, slutta han med eit optimistisk smil.