Ynskjer tiltak for å styrka ferjesektoren
Då Fylkesutvalet handsama saka om kartlegging av ferjetilbodet, fekk dei vedteke eit tilleggspunkt om å styrka ressursane.
Publisert
Som Grenda skreiv torsdag har Hovudutval for samferdsel og mobilitet (SAMO) nyleg fått presentert ei sak om kartlegging av ferjetilbodet i Vestland. I sakspapira vart det antyda at ein kan flytta ressursar frå Gjermundshamn-Varaldsøy-Årsnes og over til Jondal-Tørvikbygd.
I førre veke kom saka vidare til Fylkesutvalet. Dei gjekk inn for punkt 1 og 2 i innstillinga frå SAMO, som mellom anna omhandla at «Ferjedrifta er kostnadskrevjande for fylkeskommunen, og tilbodsnivået blir tilpassa endringar i reisestraumar både ved vekst og reduksjon» og «Fylkesutvalet ser forslaget om retningslinjer for ferjetilbodet som eit viktig grunnlag for å avklare tilbodsnivået for ferje i nye driftskontraktar». Desse to utdraga er også identiske med fylkesdirektøren si opphavelege innstilling.
Annonse
Omkøyring
Men punkt tre har fått nokre viktige endringar. Fylkesdirektøren skreiv «Fylkesutvalet ber om at det blir arbeidd vidare med tiltak for omprioritering av ressursane innanfor ferjesektoren, som førebuing til nye driftskontraktar». Dette vart delvis endra i SAMO, og i Fylkesutvalet lanserte Kåre Martin Kleppe (H) eit alternativ med ei lita, men viktig endring i fyrste setning. Punkt 3 lydde då:
«Fylkesutvalet ber om at det blir arbeidd vidare med tiltak for styrking, og omprioritering, av ressursane innanfor ferjesektoren, som førebuing til nye driftskontraktar og heilskapleg arbeid for ferjetilbodet i fylket. I dette arbeidet skal det òg vektleggast om sambandet har andre omkøyringsvegar, med ekstra fokus på opningstid der det ikkje er akseptable omkøyringsmoglegheiter». Dette vart samrøystes vedteke.
Saka skal vidare til Fylkestinget 11. desember.
