Ynskjer tannklinikk på Rosendalstunet

Rosendal tannhelseklinikk er igjen føreslege nedlagt. Eldrerådet ynskjer i staden at klinikken vert flytta til Rosendalstunet.

Etter eldrerådet sitt møte 19. november, har leiar Vidar Ask sendt brev til ordførar og kommunedirektør. Der viser han til at strukturplanen for tannklinikkar i Vestland fylkeskommune no er under revisjon. Høyringsfristen er 14. januar. Blant forslaga der er at Rosendal tannhelseklinikk, som i dag ligg på tomta Heradstun, blir nedlagt.

«Ifølgje Fylkestannlegen er ikkje den gamle klinikken eigna for ny drift. Eldrerådet si meining er at klinikken bør flyttast til Rosendalstunet, og på sikt også ta med helsesenteret frå rådhuset dit», står det i brevet frå Vidar Ask.

Han understrekar at god tannhelse for dei eldre er svært viktig.

«Omlag 70 bebuarar på Rosendalstunet har avtale om tannbehandling ved klinikken, og vert tannklinikken i Rosendal lagt ned, må desse ha taxi til Husnes, ofte med følgje. Det kan ikkje vera berekraftig, korkje menneskeleg eller økonomisk å køyra 70 pasientar frå Rosendalstunet til klinikken på Husnes. Det vert dyrt og ressurskrevjande, og det vil utsetja dårlege sjukeheimspasientar for store påkjenningar», heiter det vidare.

Ledig lokale

Ask opplyser også at både tannhelsetenesta og omsorgs- og pleiepersonalet sluttar seg til framlegget om å flytta klinikken til Rosendalstunet. Der er det dessutan ledig lokale, som er lett tilgjengeleg for alle.

«Tannklinikken har også avtalar med mange born og vaksne. Ved ei flytting til Husnes må born med føresette vera borte frå skule og arbeidsplass i fleire timar, og kanskje ein heile dagar», heiter det i brevet.

Eldrerådet bed ordførar/administrasjon ta saka opp med Fylkestannlegen.