Ynskjer seg ein demensvenleg kommune

Nasjonalforeningen for folkehelsen har starta eit initiativ for få kommunar med på laget, og målet er at personar med demens skal kunna bli meir sjølvhjelpne og kunna leva aktive liv lengst mogeleg.

– Ordføraren er positiv til at Kvinnherad skal bli ein demensvenleg kommune. Fleire og fleire får demens, og me ser det som viktig å ha respekt for heile mennesket. Helselaget kjem ikkje til å gje seg i dette initiativet, lovaBente Haugen frå Rosendal Helselag innleiingsvis.

– Går berre éin veg

Sjukepleiar Astrid Naterstad jobbar på demensavdelinga på Rosendalstunet, og var invitert med som føredragshaldar – utan Power Point og overhead.

Ho utdanna seg på 1980-talet, og konkluderte med at om arbeidet og kunnskapen har endra seg undervegs, har grunnsynet bestått.

– Sjukdommen utviklar seg i ulik fart og alvorsgrad, men han går berre ein veg. Eg går ikkje spesielt inn på dei ulike variantane av demens, poenget er uansett å hjelpa dei som er råka av sjukdommen, innleia ho.

Naterstad har jobba med demente i fleire tiår, og er også ein del av Hukommelsesteamet i Kvinnherad kommune, blant anna i saman med den andre føredragshaldaren Evelyn Mehl Willumsen.

– Det logiske er ikkje logisk for ein person med demens, påpeika Naterstad og fortalte korleis ho og dei andre på hennar avdeling ved Rosendalstunet tolka orda og handlingane til bebuarane når orda byrja å svikta for dei.

– Viss dei vil til mor, så har dei ofte vondt eller er redde, og dei vil tilbake til der dei føler seg trygge. Så barn og personar med demens har litt til felles. Ein må tenkja litt for dei, men ikkje overkøyra dei, sa Naterstad.

Respekt og forståing

– Det er eg som må omstilla meg, bruka tid og finna nye vegar inn til den sjuke. Dei som har fått denne demenssjukdommen er flotte, heile menneske. Sjukdommen råkar både den sjuke og familien, la ho til før ho overlét taletida til Evelyn Mehl Willumsen.

Willumsen fortalte dei kring 30 frammøtte om arbeidet til Hukommelsesteamet, kva som skjer når teamet blir kopla på og om deira samarbeid med både fastlege og pårørande.

Teamet ynskjer også at Kvinnherad skal seia ja til å bli eit demensvennleg samfunn. Det er nasjonalforeininga som held kursmateriell og står for opplæring, og avtalen er gratis for kommunen å vera med på.

– Ved å bli møtt med respekt og forståing, vil personar med demens og deira pårørande oppleva tryggleik, fridom og verdigheit. Kunnskapen bidreg til at arbeidskvardagen i ulike serviceyrke blir enklare, og kommunar og servicenæringar som deltar får eit positivt omdøme, argumenterer nasjonalforeininga.

Bente Haugen gjentok avslutningsvis ønsket om at kommunen sluttar seg til avtalen, og lova at Rosendal Helselag skulle halda fram arbeidet sitt på feltet.

– Dette er starten på folkeopplysinga, sa Bente Haugen då ho avslutta møtet.