Ynskjer sak om breibandskabel
I siste formannskapsmøtet før jul tok Ove Lemicka (Frp) opp eit spørsmål om ein fiberkabel under Hardangerfjorden.
Publisert
Lemicka opplyste i Formannskapet at Kvinnherad kommune for nokre år sidan deltok i eit spleiselag for å sikra Kvinnherad Breiband AS eigarskap til ein stamkabel i fiberstrukturen på Vestlandet, som går under fjorden til Kvinnherad.
«Dette vart gjort for å hjelpa selskapet med investeringa i denne infrastrukturen i ei tid der selskapet var i ein oppbyggingsfase. Det er blitt opplyst at den gongen deltok Kvinnherad kommune med 2/3-delar av investeringa og selskapet med 1/3-del. I dag trur eg det kan vera grunn til å avvikla dette hjelpetiltaket, slik at breibandselskapet eig og forvaltar den infrastrukturen dei har bruk for som sin eigedom», sa han.
Annonse
Lemicka undra om ordføraren kunne be administrasjonen greia ut denne saka, og eventuelt koma tilbake med ei sak der det kjem forslag om å føra over heile eigarskapen av fiberkabelen til Kvinnherad Breiband AS mot naudsynt økonomisk oppgjer til kommunen.
Det vart ikkje gjeve svar i møtet. Heller ikkje i protokollen står det noko svar.
