Ynskjer reglar for tilskot til bøker
Kommunen får stadig søknader om å gje tilskot til lokalhistoriske bøker, men det har vore ganske tilfeldig korleis dei har blitt handsama. Ordføraren ynskjer difor ei meir formell ordning.
Publisert
Sist oppdatert
I september sendte Lions Club Halsnøy og gjengen bak bøkene om frakte- og fiskebåtar frå Halsnøy ein søknad til formannskapet. Der ber dei om ei løyving på inntil 50.000 kroner til bok nummer to, som kjem i november.
Men søknaden stod ikkje på saklista til formannskapet på tysdag. Ordførar Vegard Bjørnevik (H) har nemleg bedt administrasjonen laga forslag til ei ordning for korleis slike søknader skal handsamast, og frå kva budsjettpost pengane skal takast frå.
Annonse
– Vi har fått ein del boksøknader, men eg føler ikkje vi har klart å gje ei god nok behandling av dei. Eg har registrert det har vore litt tilfeldig korleis vi har løfta (teke opp til formell behandling, jour. merk) desse sakene, og nokre har ikkje blitt løfta i det heile. Alt er gode prosjekt, men er det dette vi skal bruka formannskapet sitt disposisjonsfond på? filosoferte Bjørnevik.
Rabinowitz
Ove Lemicka (Frp) støtta forslaget om ei betre innretning for handsaming av søknadane.
– Vi har etablert ein praksis med å støtta slike lokalhistoriske verk, men vi bør ha ei ramme. Det blir heil feil å seia at «no skal vi ikkje gje pengar til slikt», sa han.
Annonse
Lemicka la til at det ikkje berre gjeld bøker. I desember 2021 løyvde kommunestyret 50.000 kroner til ein kortfilm om jøden Moritz Rabinowitz, som vart arrestert av Gestapo på øya Toftekalven i desember 1940.
– Behandlinga har vore litt tilfeldig. Kanskje vi kunne hatt eit par oppsamlingsheat i formannskapet, slik at vi får gjort det meir konsekvent, føreslo Per Harald Havnen Löfgren Johansen (Ap).
