Ynskjer reell medverknad i politiske saker

Kommunestyremøtet førre veke starta med ei orientering frå Ungdomsrådet. Dei stilte sterkt med leiar Frøya S. Hatteberg frå KVV, nestleiar Tord S. Hatteberg frå KVV og Eirik Johan Arnevik frå Øyatun skule. Trioen kunne opplysa at det i Kvinnherad er 1206 innbyggjarar i aldersspennet 13 til 19 år.

Av saker rådet har jobba med, trekte dei fyrst fram skulehelsetenesta. Ungdomsrådet ber om fleire tilsette i denne tenesta, slik at alle elevar får dekka behova dei har innan helse

– Ei god psykisk og fysisk helse heng mykje saman med god læring og trivsel, slo Tord fast.

Stupetårn

Ungdomsrådet har elles sendt inn uttale til fylkesdirektøren sitt forslag om kutt i ferjetilbodet.

– Vi håpar dei også høyrer på dei unge, ikkje berre dei vaksne, kommenterte Frøya.

Rådet jobbar elles for å få trygge skulevegar, uttaler seg om reguleringsplanar, og ser fram til at Kvinnherad kommune skal innføra fritidskort. Dei ynskjer også at ordninga med «hent meg-buss» skal utvidast til fleire stader i Kvinnherad. Dessutan har dei eit spesielt ynske.

– Vi ynskjer at det skal bli bygd eit heftig bra stupetårn i Kvinnherad, smilte Frøya S. Hatteberg.

Tord S. Hatteberg kunne leggja til at Ungdomsrådet ber om reell medverknad i politiske saker, ved at leiar og nestleiar i rådet får møte-, tale- og forslagsrett i Kommunestyret i saker som gjeld dei unge. Vidare har dei lyst å få til ein politisk verkstad der ungdomane kan møta politikarane, slik at dei kan ta opp ulike saker og få til betre kommunikasjon mellom partane.

Nettvett og alkohol

Representantane for Ungdomsrådet presenterte også nokre meir generelle punkt om det å vera ung i dag. Dei tek mellom anna til orde for:

* at føresette skal få tidlegast mogleg informasjon og innføring i korleis ein skal handtera skjermbruk, nettvett, alkohol og søvn blant unge.

* at det vert halde fleire informasjonsmøte til føresette om korleis avgrensingane frå føresette påverkar desse tinga, og korleis føresette er den viktigaste figuren i oppveksten.

Til slutt fortalde Frøya S. Hatteberg at Ungdomsrådet i Kvinnherad sitt budsjett har vore på 50.000 kroner heilt sidan 2019. I Kvam har dei derimot 150.000 å rutta med.

– Vi ynskjer å få auka den summen, oppmoda ho.

– Tusen takk for ein fantastisk god og innhaldsrik presentasjon. Dette tek vi med oss, lova ordførar Vegard Bjørnevik (H) etter føredraget.

Saknar mest

Per Harald Havnen Löfgren Johansen (Ap) var samd i forslaget om å utvida «hent meg-bussen».

– Kva ungdomstilbod er det de saknar mest i Kvinnherad i dag? spurde han også.

– Då eg vaks opp var det to val; friidrett og fotball. Eg valde fotball. No i det siste har eg funne ut at det kan vera vel så kjekt å spela volleyball. Men det er det ingen tilbod for i Rosendal. Vi har gode tilbod i Kvinnherad, problemet er at det er vanskeleg å koma seg til dei, svarte Tord S. Hatteberg, og la til at ein utvida «hent meg-buss» vil gjera det lettare å koma seg til og frå tilboda i dei ulike bygdene.

– Kva skal til for å koma heim? undra Helge Tangerås (H).

– Skal eg flytta heim, vil eg ha svart på kvitt at mine ungar skal ha barneskule, ungdomsskule, og ein vidaregåande med eit godt tilbod. Spesielt yrkesfag er viktig, understreka Tord.

Stine Hatteberg (H) følgde opp punktet om stupetårn.

– Vi har eit stupetårn, vi må berre finna ein plass til det. Hjelp oss med det, oppmoda ho.

Knut Johannes Helvik (H) kunne røpa at det i budsjettet for neste år vil bli lagt inn meir pengar. Vegard Bjørnevik antyda samstundes at også ynsket om møte- og talerett kan bli oppfylt.