Ynskjer høgare kompetanse i barnehagen

10. oktober la regjeringa fram ein revidert versjon av strategien Kompetanse for fremtidens barnehage. Denne inneheld konkrete tiltak som skal bidra til å heve kompetansen i barnehagen for perioden 2023 - 2025.

Satsinga har ein prislapp på 236,6 millionar ferske kroner.

Kunnskapsminister Tonje Brenna (Ap) meiner den førre regjeringa hadde alt for låge ambisjonar for kvaliteten på barnehagen, og Støre-regjeringa vil no leggja til rette for eit løft.

– Eitt av dei største problema i det norske utdanningssystemet er at me har minst kompetanse rundt barna i den tida som betyr mest for utviklinga deira. Regjeringa vil auka kompetansenivået i barnehagen frå dagens nivå der kvar tredje tilsette manglar barnehagelærarutdanning eller relevant fagarbeidarutdanning, seier kunnskapsministeren i ei pressemelding.

Eitt av fleire grep

Dette vil dei gjera ved å setja av midlar til ulike satsingar i statsbudsjettet for 2023.

• 630 nye vidareutdanningsplassar for barnehagetilsette (auke på 120 millionar kroner)

• Auka etterutdanningstilbod for tilsette i barnehagen (auke på 60 millionar kroner)

• Styrking av barnehagelærarutdanninga (auke på 50 millionar kroner)

• Kompetansetiltak for tilsette i samiske barnehagetilbod (auke på 6,6 millionar kroner)

Kompetansestrategien for denne perioden er eitt av fleire grep som regjeringa no tar på barnehageområdet. Strategien byggjer vidare på tiltak som har vore gjeldande for perioden frå 2018 til 2022.