Ynskjer gratis barnehage i Kvinnherad

– 15.000 innbyggjarar er realistisk om me gjer dei rette politiske vala, meiner ordførarkandidat Thea Vaage og andrekandidat Per Harald Havnen Löfgren-Johansen i Kvinnherad Arbeidarparti.

Dei har tatt moderpartiet sitt slagord frå ti år sidan, tilpassa det til lokale forhold og landa på «Vi tar Kvinnherad vidare» som slagord for deira valkamp i år.

Ferdig i eit halvt år

– Programmet vårt må vera ferdig før me har nominasjonsmøtet, og såleis har me hatt programmet vårt klart i over eit halvt år no. Når du seier ja til å stå på lista til Kvinnherad Arbeidarparti, så veit du kva du står på val for, forklarer Vaage og Löfgren-Johansen.

– Me vil satsa vidare på å få endå fleire i heiltid, og så har me læregarantien, som me ynskjer å utvida til å sikra alle som tar fagutdanning i Kvinnherad kommune fast jobb etter læretida, ikkje berre helse og oppvekst. Det vil vera med på å halda folk i kommunen, meiner Vaage.

Ho trur også at fleire i heiltid vil føra til mindre sjukefråvære.

– I saman med det ynskjer me også generelt høgare grunnbemanning. Me trur at det vil spara seg inn med både lågare sjukefråvære og etablering av ressursbank med tilsette som går inn der det trengs, i staden for å bruka oss av dyre vikarbyrå, meiner Vaage.

Gratis barnehage

– Noko av det som gjorde at eg gjekk inn i politikken er eit brennande ønske om å støtta barnefamiliane i Kvinnherad, og samtidig leggja til rette for tilflytting. Me har eit hårete mål om gratis barnehage i Kvinnherad, seier Löfgren-Johansen.

Det vil ha fleire positive ringverknader meiner han, og nemner like mogelegheiter frå starten av som ein av dei.

– Eg veit med mine eigne barn kor godt det er for barna å bli sosialisert tidleg. Samtidig veit ein kor stor utgift barnehage er for ein familie, i dag er det 33.000 kroner i året for eitt barn. Me trur gratis barnehage vil kunna trekka familiar til Kvinnherad frå heile landet, seier 2. kandidaten til Kvinnherad Arbeidarparti.

Han ser det også som eit grep som vil gjera det lettare for Kvinnherad-bedrifter å få dekka behovet etter arbeidskraft.

– Me veit at dette må gjerast stegvis og kontrollert, for 20 millionar kroner rett ut med ein gong, vil vera for heftig. Me har ein ambisjon om å koma i mål innan slutten av perioden, så kanskje 25-30 prosent reduksjon første året er kanskje eit passeleg steg, vurderer Löfgren-Johansen.

– Me må gjera ting på ein forsvarleg måte, og har ein kommuneøkonomi å forhalda oss til. Men dette er ei investering no, som me trur vil betala seg i framtida, legg Vaage og Löfgren-Johansen til.

Lukka anlegg

Eit rikhaldig program let seg ikkje oppsummera på få ord, men på ønskelista står både kvinnefengsel og lukka oppdrettsanlegg.

– Me ynskjer å halda fram arbeidet med å få kvinnefengsel til Kvinnherad, som vil bidra til fleire arbeidsplassar, seier Vaage.

Löfgren-Johansen har fleire hjartesaker, inkludert lukka oppdrettsanlegg.

– Opprydding av fjordane våre krev at næringa går over til lukka anlegg. Me har eit ønske om at Kvinnherad skal vera ein føregangskommune på slikt. Me har næring i kommunen, som til dømes Herde Kompositt, som kan vera med leggja til rette for lukka anlegg.

Betre bassengtilbod også ein fanesak for dei to.

– I Norge har me vore flinke å jobba med å få ned talet dødsfall i trafikken, men talet på drukna har stått i ro. Me treng basseng opne i lengre periodar enn dei er no.

– Kva vel de vekk for å få til dette?

– Det er ei ønskeliste for oss dette. Men me må sjå på dei store investeringsprosjekta. Låneopptaket vårt er stort nok. Viss me skal vera ansvarlege i styringa vår, så må me sjå på kva det behov for. Ein må styra kommuneøkonomien som ein ville gjort med privatøkonomien, på ein ansvarleg måte, seier dei to toppkandidatane.

Skule og samferdsel

– Me treng betre veg veldig mange plassar i Kvinnherad, men her også må me vera så keisame at me må behovsvurdera kva som skal prioriterast, det kjem i Kvinnheradpakke 2 og etter kvart Kvinnheradpakke 3. Realisering av Sunnfast ligg som eit viktig punkt for oss, og me ynskjer at ein arm mellom E134 og Bergen går gjennom Kvinnherad, seier dei.

Kvinnherad Arbeidarparti har tenkt å behalda strukturen som han ligg no.

– Om foreldre ønsker å leggja ned skular, så kjem me til å sjå på det, men me kjem ikkje til å ta noko initiativ for å leggja ned nokon. No kjem det ein flott, ny skule på Husnes, og det kan gjera at nokon kan ha lyst til å gå der, men me går ikkje til val på å gjera noko der, seier Thea Vaage.

– Om ein har ein ny debatt om skulestruktur kvart fjerde år, så har det ein tendens til å bli ein sjølvoppfyllande profeti. Ingen er tent med at det blir ein omkamp i kvar einaste valperiode, sluttar dei to toppkandidatane.