Ynskjer dialog om storleik på idrettshall

– Arbeidet med ny idrettshall i Rosendal kan ikkje venta lengre. Det skriv styret i Rosendal Turnlag i eit brev til Kvinnherad kommune. Samstundes opnar laget for drøftingar om storleiken på hallen.

Rosendal Turnlag (RT) har i mange år etterlyst ny idrettshall i Rosendal, og slår fast at «både idrettslag og skular har eit stort udekka behov for innandørs hallkapasitet». I eit brev til kommunen oppmodar dei difor om at kommunepolitikarane i haustens budsjettbehandling set av nødvendige budsjettmidlar til kjøp av grunn, og prosjektmidlar for oppstart av arbeidet med ny idrettshall.

«Vi kan ikkje godta at idrettshallen blir ein salderingspost i budsjettet og skuva ut i ei uviss framtid med dei konsekvensar det har for idrettstilbodet for dei mange born og unge som bur i den delen av kommunen», skriv styret i RT.

Brukarundersøking

RT legg til at behovet for idrettshall både er stort og veldokumentert. I brevet trekkjer dei fram kommunen si eiga brukarundersøking frå 2022, som konkluderer med at: «Ei samla vurdering tilseier at ein ny og større idrettshall i Rosendal er naudsynt for å oppretthalde gode og forsvarlege tilbod i undervisninga hjå skulane, og for at dei frivillige organisasjonane har eigna areal til å drive fysisk aktivitet innandørs i periodar av året».

Kommunestyret vedtok i oktober 2022 at det skal regulerast for ein fleirbrukshall langs og sør for bassenget i Rosendal. Vedtaket seier også at arealet skal vera stort nok til å kunna planleggja for stor fleirbrukshall. I områdeplanen for Rosendal som i desse dagar vert sendt ut på høyring, er det sett av 2500 kvadratmeter til idrettshall.

«Idrettslaget ønskjer å greia ut ein stor fleirbrukshall. Men vi meiner det er uheldig alt i områdeplanen å avgrensa arealet på hallen til 2500 m2 før det er gjort naudsynt kartlegging av kva funksjonar hallen skal romma og kva krav som skal tilfredsstillast. For å koma i gang med arbeidet med ny idrettshall, er det eit stort behov og ønske om raskare prosess rundt erverv av grunn og tydeleg prioritering i budsjettet», kommenterer RT.

Foreldre og frivillige

For å koma vidare med saka, er Rosendal Turnlag innstilt på å gå i dialog med kommunen og kommunepolitikarane om storleiken på hallen.

«… basert på dei krav og spesifikasjonar som må tilfredsstillast for at idrettslag, skular og andre organisasjonar skal få eit fullgodt og framtidsretta tilbod. Eit godt tilbod fortener dei mange born og unge som til dagleg deltek i mange ulike aktivitetar i regi av idrettslag og skular, og dei mange foreldre og frivillige som legg ned ein stor innsats for å leggja til rette for dette», avsluttar styret i RT.