Ynskjer å utvida: Bar-On søkjer midlar frå næringsfondet

Kostnadane i prosjektet vil ifølgje budsjettet som er sendt inn koma på 349.412 kroner, og arbeidet vil etter planen bli utført av lokale leverandørar som Kvinnherad Bygg og Kvinnherad Elektro, med fleire.

Bar-On søkjer difor om 150.000 kroner frå det kommunale næringsfondet.

I prosjektskildringa kan ein lesa at tanken bak tiltaket er å utvida uteserveringa slik at det blir tilrettelagt for heilårsdrift, i staden for at dette arealet berre kan nyttast i sommarsesongen.

«Bar-On skal byggja eit takoverbygg over utvendig terrasse på 50kvm med varmelampar, sofagrupper, effekt belysning og anna», skriv Bar-On i søknaden.

Kan auka omsetninga monaleg

Dei meiner at ei slik utviding vil bidra til høgare omsetnad, fleire arbeidsplassar og eit triveleg utemiljø.

Den estimerte omsetnaden til utestaden er rekna til 4,5 millionar kroner for 2022. Ved ei eventuell utviding av uteserveringa vonar dei å kunne auke omsetnaden med 20 prosent.

«Vi har tidlegare investert tungt i oppgradering og utviding av terrassen og berekonstruksjonen med eigen innsats og bruk av eigenkapital. Dette tiltaket vil føre til eit lunare og meir opplyst uteområde, som også er eit godt sikkerhetstiltak», argumenterer dei i søknaden.

Prosjektet har planlagt oppstart allereie 1. november, og skal vera ferdig ved utgangen av året.