Ynskjer å skapa aktivitet og liv i Rosendalsområdet
Janne Hjelmeland har sete eit halvt år som dagleg leiar i Rosendal utvikling. No når samfunnet er attende til normalen håpar ho at det blir mogleg å få i gong meir aktivitet for næringslivet og innbyggjarane i området.
Publisert
Sist oppdatert
Først ut blir det invitert til foredrag med Linda Bøthun. Bøthun er ein sertifisert leiartrenar og coach som held til i Skånevik. Hjelmeland kom i kontakt med Bøthun gjennom Kvinnherad Næringsservice, og håpar foredraget er noko fleire kan finna interessant.
– Det siste halve året har vi ikkje fått gjort så veldig mykje, men eg har planar om å få til eitt større arrangement i året. Føredraget med Linda Bøthun blir kanskje ikkje så stort, men representerer iallfall noko av det som eg kan tenka meg at vi får til meir av her, seier ho.
Annonse
Foredraget til Bøthun går over tre timar, og blir halde i Folgefonnsenteret 21. april. Folk har allereie byrja å melda seg på.
– Eg har ikkje fått heilt spikra kva ho vil fokusere på, men ho var utruleg positiv og bobla over av idear, så dette trur eg blir veldig bra. Så blir det jo fint å endeleg kunna treffast igjen, fortel Hjelmeland engasjert.
Mykje nytt å setja seg inn i
Rosendal utvikling hadde nett kome opp i 54 medlemmar den dagen Grenda var innom kontoret. Sjølv om ho ikkje har faste arbeidsdagar, brukar Janne om lag tre dagar på kontoret i 1. etasje i bygget der Kvinnherad Elektro held hus. Så langt har mykje av tida hennar som dagleg leiar gått med til å setje seg inn i nye ting.
Annonse
– Det har vore travelt, lærerikt og veldig mykje nytt å ta tak i. Eg gjekk jo til denne stillinga frå å vera frisør i 27 år, og det har såleis vore litt av eit karrierebyte, seier Hjelmeland.
Med eit solid styre i ryggen har ho alltid nokon å rådføra seg med dersom det er noko ho lurer på. Dette set ho stor pris på.
– Som frisør var eg jo van med å sjå resultat etter ein halvtime, men her må eg vera tolmodig og arbeidet som blir gjort er veldig langsiktig. Det har vore litt nytt for meg. Vi vil nok sjå nokre resultat undervegs, men vi skal jo stadig ha ei utvikling, og då får ein ikkje resultata på den same måten.
Langsiktige resultat
Som eit døme på undervegs-resultat blir parken langs Hattebergselva i Rosendal, som Svein Jarle Mehl har vore prosjektleiar for, nemnd.
Rosendal Utvikling har samarbeidd med Rosendal Helselag og Rosendal Bygdelag for å utvikle området langs Hattebergselva til ein park. Janne har mellom anna delteke med å søkje pengar til finansiering, og prosjektet har motteke 120.000 kroner i gåve frå Sparebank 1-Stiftinga Kvinnherad, samt 20.000 frå Eide Fjordbruk og 24.000 frå Fjæreskulen.
Annonse
Førebels er området rydda og tilrettelagt med grus og benkar, og det er også planar om å setje opp ei open hytte og leikeapparat.
Ynskjer å strekkje sesongen
Som ein interesseorganisasjon for det lokale næringslivet, i hovudsak frå Dimmelsvik til Sunndal, er det mange ulike næringar som skal dra nytte av det Rosendal Utvikling skipar i stand.
– Når vi har utvikling i bygda vil det vera til gagn også for dei andre verksemdene som ligg rundt. Vi er såleis med å utvikla heile området i lag. Sjølv om vi har er eit veldig breitt spekter av bedrifter her, er næringslivet i og rundt Rosendal veldig sesongbetont. Dette er litt av utfordringa vår; å strekkje sesongen og å skapa større aktivitet i vinterhalvåret, forklarar Janne, før ho held fram:
– Rosendal Utvikling skal vera ein ressurs for næringsliv og organisasjonar i Rosendal og omegn, og om det er nokon som har idear, ynskjer eller ting dei lurer på er det berre å ta kontakt, sluttar ho.
