Yin Yoga og klassisk yoga i Helgheim

Siw Birgitte har praktisert yoga sidan 2003, har yin yoga-utdanning og er i gang med fleire kurs. I Uskedalen tilbyr Siw Birgitte to ulike typar yoga, klassisk yoga og yin yoga. Ho fortel at workshoppane passar for alle, og at ein ikkje treng å ha erfaring med yoga på førehand for å melde seg på.

– Yoga kan egna seg for alle aldersgrupper, og nivået på øvingane blir tilpassa etter kvar einskild. Poenget er å bli kjend med eigen kropp, ein skal tøya opp mot eigne grenser, ikkje over. Etterkvart kan deltakarane utvikla ein meir mjuk, smidig og sterk kropp samt betre balanse, seier ho.

Det var tidlegare eit tilbod om yoga i Uskedalen, som mange nytta seg av. Tilbodet var sakna, så Siw Birgitte bestemde seg for at ho ville oppretthalda det.

– Det er mange som ynskjer tilbod om yoga i kommunen, og eg har til dømes fått førespurnad om kurs på Sunde, seier ho.

Oppslutnaden er bra, men det er framleis mogleg å melda seg på workshop i Uskedalen. Etter kvart håpar Siw Birgitte på å starta opp på Sunde også.

Yin og klassisk Yoga

Om dei to ulike variantane fortel ho at klassisk yoga passar for deg som ynskjer ein aktiv yoga time. Timen byggjer på å styrka kroppen, samt smidigheit, uthaldenheit og balanse.

Yin Yoga passar for deg som ynskjer å løysa opp i ein stiv og energifattig kropp. Med yin yoga praksis løyser vi opp i bindevevet og meridianane (energibanane i kroppen) for å få energiflyt og løyse opp stress som har sett seg i kroppen. Det passer for deg som treng å roa ned i ein elles så travel kvardag.