Wattn i internasjonal kåring
Tysdag annonserte straumselskapet Wattn at dei er ein av 12 nominerte som går vidare i «CHARGE Energy Branding Award». Administrerande direktør Øystein Vikingsen Fauske er glad og stolt for nominasjonen.
Publisert
Sist oppdatert
– Det starta med 130 nominerte, og så gjekk 12 vidare, og vi er ein av dei 12. Nokon av dei andre er Shell Energy, DNV, Edison Electric Institute og Atlas Renewable Energy. Så her er vi i godt selskap, fortel han.
Det er fira blide andlet som møter meg i Dimmelsvik denne tysdagen, dei tre tilsette som til vanleg jobbar her og administrerande direktør Fauske. Det er ikkje lenge sidan dei tre i Vestlandsenergi blei del av Wattn, men dei ser allereie ut til å jobba godt ilag.
Annonse
– Vi veit at vi som selskap har gjort noko rett når vi får ein så fin nominasjon, seier digital marknadsrådgjevar og analytikar Magnhild Haugland.
Ho er ein av dei tre som til dagleg sit i Dimmelsvik, saman med seniorrådgjevar Kenneth Ingvaldsen og kundekonsulent Kamilla Tvedt.
– Vi er ikkje så store, men vi visar kva vi kan få til. Vi har 8 lokasjonar og 50 tilsette som samarbeider dagleg, seier Fauske.
– Det har vore ein veldig smidig overgang, og det er kult av vi no kan vera innovative og lokale, det kan vi når vi har eit så stort kompetansemiljø som sit rundt om i Noreg. Vi kan spela kvarandre gode og det kjem òg kunden til gode, skyt Magnhild inn.
Annonse
Straumselskapet Wattn blei lansert i november i fjor, og er no knappe året. «Dei er skapt og eigd av TAFJORD, Sogn og Fjordane Energi, Tussa, Sognekraft, Stryn og Vestlandsenergi. Wattn har framtidsretta produkt og tenester med fokus på smart teknologi og berekraft. Gjennom løysingar ynskjer vi å gi kundane betre innsikt og kontroll over kostnadar og forbruk. Wattn har 50 tilsette fordelt på kontor i Ålesund, Sandane, Førde, Florø, Ørsta, Stryn, Vik i Sogn og Kvinnherad, og vil fortsette med å vere like lokale som tidlegare, berre med eit endå større kompetanseteam», heiter det i pressemeldinga som vart sendt ut tysdag morgon.
Wattn er nominert i kategorien «World's Best Challenger Brand». Kåringa finn stad på Reykjavik den 17. oktober. Det vil bety mykje for eit mindre selskap på Noregs vestkyst å vinna ei slik internasjonal kåring. Fauske fortel at dei føler allereie at dei har vunne – i alle fall har dei tatt ein slags delsiger.
– Dette er fantastisk flott, og ei stor anerkjenning til alle i Wattn for jobb godt gjort, seier han.
Blir det kake på kontoret no då?
– Ja, det kan eg faktisk lova, seier Fauske.
