Vurderer tilbygg på Hatlestrand helsesenter

I mai i år skreiv Grenda om at Hatlestrand helsesenter ikkje har hatt eit skikkeleg venterom sidan i fjor haust. Dei som ventar på time sit i gangen, og pasientar på båre må passera rett forbi. Personalet synest det er uetisk, og også problematisk av smittevernomsyn. Det gjer ikkje saka betre at toalettet ligg rett på sida, og derifrå er det ganske lydt.

Til Grenda sa Knut Bjørgvik, einingsleiar for bygg og eigedom, at det ikkje låg føre planar om å gjera noko, og at det heller ikkje fanst pengar til det.

Kommunestyremedlem Per Svindland (Frp) var med under Grenda sitt besøk på Hatlestrand i mai. Han lanserte fleire alternativ for korleis tilhøva på helsesenteret kunne forbetrast, mellom anna eit tilbygg.

– Det er lite tilfredsstillande slik det er no, for å seia det på ein mild måte, kommenterte Svindland den gong.

Manglar skikkeleg venterom: – Eg synest det er uetisk

Tek seg fridom

Kanskje kan saka no ordna seg likevel? For Svindland tok opp tråden i kommunestyret for tre veker sidan.

– Når skal kommunen utbetra venterommet på Hatlestrand helsesenter, no når det er auke pasienttalet? Eg har teke meg den fridomen og engasjert Måge & Nistad Bygg. Dei har laga eit estimat for kva det vil kosta å byggja ut venterommet, og det viser 1.350.000 kroner, sa han.

Kommunedirektør Leif Ove Mikkelsen sa fyrst at han håpa at flyttinga av pasientlister frå Rosendal til Hatlestrand er av kortvarig karakter, då det er lyst etter ny fastlege i Rosendal. Men han vedgjekk at det har oppstått plassutfordringar etter at samlokaliseringa mellom helsesenter, helsestasjon og fysioterapeut vart innført.

«I etterkant har ein sett at det er behov for større plass og behov for ombyggingar, og kanskje er det eit tilbygg av helsesenteret som må til. Her må det fyrst avklarast kva det konkrete behovet er, deretter få utarbeidd ein kostnadskalkyle utifrå dette. Dette kartleggingsarbeidet er ikkje starta per no, men administrasjonen har merka seg behovet», heiter det i protokollen.