Vurderer gratis smørjemåltid i barnehagane

I eit verbalpunkt til handlings- og økonomiplanen 2024-2027 heiter det at kommunedirektøren skal greia ut gratis smørjemåltid til alle barnehagebarn i Kvinnherad. Særskilte moment i utgreiinga var eventuelle krav til auka grunnbemanning i kvar barnehage som konsekvens av ei slik innføring, eventuelle krav til betring av fasilitetar, og alle kostnadar knytt til smørjemåltid. Eit slikt måltid omfattar ikkje varme måltid som middag.

Kvinnherad kommune har i dag barn i ni kommunale og fem private barnehagar. Det går om lag 600 barn i desse. Undersøkingar har vist at det dei føresette er minst nøgde med, er måltida i barnehagane.

I analysen har kommunen teke utgangspunkt i smørjemåltid alle dagar både til frukost og lunsj, i tillegg til ettermiddagsmat med frukt og noko brødmat/knekkebrød. Per i dag har barnehagane ulik praksis på tal måltid og kostnadar i foreldrebetalinga.

«Dersom det skal det bli gratis smørjemåltid for alle barn, er dei tilsette tydelege på at det må tilsetjast ein kjøkenassistent/kokk med kompetanse innan mat og kosthald. Denne personen må koma utanom grunnbemanninga, slik at det ikkje går ressursar bort frå barnegruppa. Styrarane har vurdert at det vil gå mellom 4 og 7 timar kvar dag til å laga til smørjemåltida, bestilla mat, handtere mat og ha god internkontroll på dette, alt etter storleik på barnehagen.

Ressursar til kjøkenassistentane må då koma utanom driftsbudsjettet», heitte det i saksutgreiinga til kommunestyremøtet for halvanna veke sidan.

Sentralkjøkenet på Husnes

«Dersom dei fleste barnehagetilsette i dei kommunale barnehagane skulle velja mellom auke i grunnbemanning og smørjemåltid med tilsett kjøkenassistent, vil dei ha auke i grunnbemanninga. Kommunedirektøren ber difor om å sjå denne saka i samanheng med rapporten om grunnbemanning før eit politisk vedtak vert gjort», vart det vidare opplyst.

Grunna signal frå politisk hald om det utgreiinga fortel om kostnadsnivået, har administrasjonen også vurdert om det kan vera ei mindre kostbar løysing med levering av mat frå det kommunale sentralkjøkenet på Husnes. Dette er mogleg å få til, men:

«Status frå eining matforsyning er at per i dag har ikkje sentralkjøkenet på Husnes arbeidsareal, kjøleplass eller bemanning til å ta på seg ei slik oppgåve», vart det konkludert.

Kommunestyret tok saka berre til orientering i denne omgang.