Vurderer både solcelleanlegg og fjernvarme frå Hydro

Då kommunestyret vedtok bygging av Kvinnherad Arena torsdag kveld, var energiløysinga eit sentralt tema. Jostein Saghaug (MDG) reagerte på at kommunedirektøren likevel ikkje vil setja opp solcelleanlegg på taket.

– Framover må totalt energiforbruk i bygningar reduserast med 50%. Eg er skuffa over at politikarane gong på gong får saker der ein vil spara på energieffektiviserande tiltak. Når dette er sagt, så håpar eg at idrettshallen vert bygd, og at den vert bygd som fyrst planlagt, sa han.

Han lanserte difor eit tilleggsforslag om at «det vert bygd solcelleanlegg og solfangarar som fyrst planlagt».

– Viss det viser seg at vi tapar på dette, så får vi heller få saka attende og sløyfa det. Men det normale er at slike anlegg betalar seg ganske raskt, understreka Saghaug.

Gaute Lund (SF) var med på desse notane.

– I Bergens-området byggjer dei bygg etter bygg etter bygg, og alt med solceller. Eg trur ikkje dei gjer det fordi det ser fint ut. Eg vil ha med eit bindande forslag i dag om at vi skal ha solceller og kanskje solfangarar, oppmoda han.

Kvinnherad Arena kan stå ferdig sommaren 2023: – Eit framtidsretta vedtak

Treng ikkje

Knut Johannes Helvik (H) minna om at det finst gode alternativ til solceller.

– Vi er alle for solceller prinsipielt, men hovudenergikjelda her er jordvarme, og det er bra, hevda han.

Sektorleiar Sigbjørn Øye opplyste at taket vil tåla solcelleanlegg, og at det er lett å montera det seinare. Han rådde til å høyra med entreprenøren Leigland Bygg om kva som er mogleg og fornuftig no. I tillegg informerte han om det planlagde prosjektet for å nytta fjernvarmen/spillvarmen frå Hydro.

– Viss det blir ein realitet, så treng vi ikkje noko solcelleanlegg, sa han, og føreslo at energiløysing blir ei eiga sak om nokre månader, når ein veit litt meir om moglegheitene.