Vurderer å selja tomteprosjekt

– Dette kjem du ikkje til å tena pengar på, vart eg fortalt. Det er for så vidt greitt, for eg held på med mykje anna som eg kan tena på. Eg har ikkje gått laus på dette prosjektet for inntekta sin del, men fordi eg ynskjer å få til noko på Sunde, seier Tormod Opdal om bustadområdet han har relativt gryteklart.

Heile eller delar?

Tormod Opdal har tatt kone og fire barn med seg frå Bergen til Sunde, etter at han fekk kjøpt det som gjennom heile livet hans har vore draumestaden, eit småbruk på Bjelland på Sunde. Med på kjøpet følgde området som han kallar Olabakken, mellom Furenesvegen, Jensavegen og Bjellandsvegen.

Der har Opdal med stor eigeninnsats fått detaljregulert inn 25 bueiningar på 11 tomter. No vurderer korleis prosjektet skal losast vidare mot realisering. Mellom anna blir sal av heile eller delar av området vurdert.

– Kvifor ikkje ta det vidare sjølv?

– Eg har fleire prosjekt som eg må ta meg av, mellom anna Husnes Tannlegesenter som eg skal til å overta. Det handlar om kapasiteten min, og så handlar det om kapital og kompetanse til å driva prosjektet, forklarer Tormod.

– Eg har sjølvsagt snakka med mange av dei etablerte som driv med bustadutvikling. Mange er interesserte, men tidene me er inne i no gjer det vanskeleg. Å dela opp prosjektet og ta det stegvis, kan vera interessant å gjera, men først får me prøva sal. Det kjem til å skje noko med dette bustadområdet det neste året, trur Opdal.

Tun

Lukkast dei ikkje med å selja, så vil dei truleg gå saman med nokon og ta det vidare.

– Men det vil krevja endå fleire gratistimar frå mi side, i tillegg til dei 1,8 millionar kronene som me har hatt i reine utgifter på prosjektet så langt. Då har eg ikkje rekna inn éi krone i løn for mitt arbeid med prosjektet, understrekar 39-åringen.

Å få pengar ut av prosjektet er ikkje motivasjonen til Tormod.

– Det kan ha vore på lista ein gong i tida, men det handlar om å ha aktivitet i bygda. Det er altså ikkje for pengane eg gjer dette, men for Sunde og Kvinnherad sin del. Eg er for dei små skulane. Me kjem frå ein skule i Bergen med over 100 elevar i første trinnet, meir elevar enn på heile Sunde skule. Eg er ikkje sikker på om det er fantastisk å samla så mange på ein stor skule, eller om åtte i første klasse kan vera betre, seier han.

Siviløkonomen og tannlegen gler seg over at det skjer noko på Sunde, og registrerer at det er stor interesse for tomtene.

– Det har vore interesse for dette området sidan 80-talet. Her er det sol i alle retningar frå ho står opp om morgonen til ho går ned, og fabelaktig utsikt i alle retningar, framsnakkar han.

Rekkefølgekrav

Historia viser at det har kosta tre år å koma dit dei er no, med reguleringsplan og utstukne tomter på plass. Infrastrukturen må dei løysa ut sjølve før noko kan byggast.

– Me har rekkefølgjekrav på oss. Siste vegstubben på 6-700 meter må lagast, og ettersom den forblir privat, må han driftast av eit veglag. Ei linje må ned i bakken, som også er dyrt, nemner Tormod av dei kostnadsdrivande hindera som står mellom tomtene og bygging på dei.

– Skal eg gje frå meg prosjektet til éin utviklar, så veit eg at det blir kataloghus til alle som skal byggja der, og alle kjem husa frå same katalogen. Det kan bli litt keisamt. Men om eg gir frå meg prosjektet, så blir det fort slik, veit han.

Feltet har fem store tomter til einebustader, men hjartebarnet hans er tunet med ti bueiningar fordelt på tomannsbustader på kring 100 kvadratmeter, plassert rundt leikeplass.

– Det passar for både nyetablerarar og dei som er ferdige med einebustad, men ikkje klar for seniorbustad. Du må byggja attraktive ting, som folk ynskjer å busetja seg i eller byggja på. Dette er det, meiner han.