Vêråret 2022 – månad for månad

Januar:

«Grå start på året», kunne Grenda fortelja. Matre slo til med temmeleg formidable 655 millimeter med regn og snø. Også Omvikdalen, Ølve og Hatlestrand nådde over 400 millimeter. Uskedalen hadde flest nedbørsfrie døger med åtte. Men det var varmt, for på Husnes strekte termometeret seg heilt til 11,4 grader på det meste.

Februar:

No var det endå verre, og Grenda slo til med overskrifta «Nesten ikkje opplett». Og det var ikkje veldig tabloidisert heller, for i dei fleste bygdene var det berre eitt eller to døger utan nedbør. Matre toppa med 527,1 millimeter. Allereie etter to månader hadde bygda fått 834 mm meir enn året før. Men igjen kom temperaturen over 10 grader på det meste.

Mars:

Endeleg snudde det, og mars vart både varm og tørr. Mauranger var våtast, men 103,3 millimeter er uansett ikkje verst. Sæbøvik registrerte 23 døger utan nedbør, og fleire andre bygder nytte også over 20 slike dagar. Meteorologisk institutt slo fast at mars blir ein stadig mildare månad, og i Kvinnherad nådde temperaturen over 14 grader.

April:

Månaden baud på mange dagar med sol. Hatlestrand hadde flest med 22. Ingen bygder fekk over 100 millimeter nedbør. På det varmaste var det 22,1 grader målt i Uskedalen. Kuldegradene hadde likevel ikkje heilt sleppt taket, for alle bygdene måtte ned på minussida.

Mai:

Nokon opplevde nok mai som ein fin månad, men det var faktisk mykje våtare enn året før. Fleire av bygdene fekk berre 11 nedbørsfrie døger, og det er gjerne ikkje så mykje å skryta av i mai-månad. Omvikdalen toppa nedbørsstatistikken med 205 millimeter regn. Temperaturen passerte 23 grader på det meste.

Juni:

2022-utgåva av juni var relativt våt, men også varm. I Uskedalen vart det likevel notert heile 17 nedbørsfrie døger, medan Rosendal berre fekk 9. Dette er ein uvanleg stor skilnad. Uskedalen toppa også temperaturoversikten med svært behagelege 31,7 pluss.

Juli:

Det vart ikkje mange dagane med badevêr i juli. Matre måtte akseptera heile 293,2 millimeter regn. All nedbøren skapte store vanskar for bøndene, og Henrik Barthel i Ølve meinte det hadde vore den vanskelegaste slåtten i dei 40 åra han har drive. Mauranger greidde akkurat 30,0 grader på det meste.

August:

Tradisjonen tru kom finvêret etter skulestart. Dermed enda det med at månaden delte seg om lag på midten med dagar med og utan nedbør. Det regna 262 millimeter i Matre, noko som sjølvsagt var mest i Kvinnherad. Husnes opplevde tropenatt den 24. august, då gradstokken ikkje kom under 20,7 grader.

September:

Endeleg fekk vi ein månad med fantastisk vêr. Frå 26. august til 12. september var det godvêr i strekk. Omvikdalen noterte seg for mest september-regn, der det vart målt 169 millimeter. Temperaturen nådde opp i 24,1 grader på det meste, målt i Uskedalen.

Oktober:

Månaden vart svært grå, men faktisk var det endå verre året før. Matre toppa med 468 millimeter regn. Sæbøvik og Mauranger fekk fem døger utan nedbør, dei andre bygdene endå færre. Oktober var varm i størstedelen av landet, og i Kvinnherad toppa Uskedalen med 21,8.

November:

«Nydeleg november» heitte det i Grenda. Rett nok vart det registrert over 330 millimeter nedbør i Matre, men vi snakkar berre regn. Snø var det knapt å sjå nokon stad. 17 nedbørsfrie døger på det meste er slett ikkje halvgale i november. Gradstokken passerte 17 grader på Husnes.

Desember:

Noko våtare månad enn året før, men ganske mange døger utan nedbør. Faktisk heilt oppe i 19 på Hatlestrand. Fyrste halvdel av månaden var nesten heilt tørr. Termometeret kom over 10 grader den 19. desember.