Vøler bryggja

– No skal vi fyrst laga til slik at vi kan støypa utanpå det gamle. Det held på å detta frå kvarandre, så ein ny mur utanpå og nytt golv oppå trengst, fortel Nils Skjelnes.

Han ser for seg at dei er ferdige med støypinga innan veka er omme, og så blir det å ta fatt på den ytste delen av bryggja.

– Det er ikkje så veldig vanskeleg, men vi er avhengig av at fjæra held seg slik den er no. Det er ikkje så kjekt å vassa uti høgt vatn, spesielt ikkje når ein har hol i vadestøvlane, fortel Skjelnes med eit smil.

Bra at det blir gjort noko

Mange har nok kika ned på bryggja og lurt på kvifor den står til forfall. Sumaren 2022 stengte kommunen den av då den var i dårleg forfatning.

– Eg håpar at folk blir glade når dei ser at vi held på her. Eg køyrer forbi sjølv og kikkar og bryggja har ikkje sett så bra ut i seinare tid, sa Helge Vågen som sto ute i vatnet og gjorde klart til støyping når Grenda var ute for å sjå.

– Det er bra at det blir tatt tak i. Og det er veldig fint å halda på no. Så lenge eg ikkje blir våt på beina så går det veldig bra, lo han, og la til;

– Etter vi har støypt skal det ytste rivast vekk. Fyrst skal det ned slike kumringar, og så skal det kles med treverk og leggast stein imellom. Så det skal sjå ut som når det vart bygd.

Prestebryggja er plassert i KULA-område (kulturhistoriske landskap av nasjonal interesse, journ.mrk.) og det er generelt byggjeforbod i området.

– Difor tek prosessen noko tid, og vi må ha byggeløyve på plass før vi kan setja i gang med restaurering, sa einingsleiar for prosjekt og utbygging Erlend Bøyum til Grenda tidlegare i år.

No er altså alt på plass, og vølinga er i gong. Då kan alle som ein gle seg til eit sommarbad ved prestebryggja til neste sommar.