Visuelle minne frå lokal topografi

I ei pressemelding kjem det fram at fotokunstnaren i sine nyaste arbeid undersøker korleis form kan ta meir plass i det fotografiske språket, og vidare korleis ho kan finne ei improvisatorisk tilnærming til arbeidet. I dei vedlagte bileta som er sendt frå Sunnhordland Museum, blir dette – både formfokuset og improvisasjonen – visualisert.

Ludvigsen jobbar med analogt fotografi og produserer sine bilete i mørkerommet. Ho nyttar eit 4x5" storformatkamera, og kombinerer gjerne fotografi med andre teknikkar.

– Ein sentral motivasjon for arbeidet mitt er korleis me oppfattar form i det fotografiske språket. Eg ønskjer å utfordre auga til å fordøye det fotografiske mindre effektivt. Auge og hjerne skal helst ikkje heilt forstå kva ein ser på, i alle fall ikkje med ein gong, skriv ho sjølv om kunstnarskapen sin.

I mørkerommet utfordrar Klara Sofie seg til å eksperimentere fram minst ti printversjonar av bileta sine, og opplever såleis at ho stadig kjem fram til nye teknikkar. I utstillinga som no opnar på Halsnøy skal ho vise to seriar som er resultat av denne metoden; «Bladverk» og «Teltduk». Sjølv om Ludvigsen ønskjer å utfordre auga og hjerne, forklarar ho gjerne korleis bileta er skapt.

– I «Bladverk» har eg plassert store former (klippa ut i papir med ulik kvalitet/gjennomlysingsevne) over fotopapiret under eksponering, og eksponert i fleire omgongar. På den måten hindrar eg lyset, og blandar meg inn i det fotografiske motivet, informerer fotografen.

Ho er den første norske kunstnaren som får bu på Halsnøy Kloster

Fordums overflateminne

Utstillinga har fått tittelen «Topohusk», som refererer til topografisk minne, eller overflateminne. Dette har, i følgje fotokunstnaren, sitt opphav i ei sterk oppleving av eit kroppsleg minne av ein plass og ei overflate som ho ikkje lenger har tilgang til. Denne referenten talar både om landskapa og overflatene ho har fotografert, men også til det fysiske aspektet ved fotografiet.

– Det meste av det fotografiske materialet i denne utstillinga er skapt på arbeidsopphaldet eg hadde på Halsnøy kloster i oktober 2020. Verka «Bein I» og «Bein II» er frå 2018. Her har eg brukt fiskebein frå Fjelberg som fotografisk motiv, skriv Ludvigsen vidare i pressemeldinga.

Og fleire tilknytt Fjelberg kjenner truleg til fotokunstnaren frå før, då ho har gjort eit stort fotografisk arbeid der tidlegare.

I prosjektet «Tallerkenverk» arbeidde ho med politikken bak sentralisering, med utgangspunkt i det vesle samfunnet på Fjelberg. Over ein tiårsperiode dokumenterte ho dette øysamfunnet, og undersøkte gjennom fotografiet korleis staden kjempa for å halda innbyggjartalet oppe. Prosjektet vart presentert på dekortallerkenar i 2016, og gjennom denne litt absurde presentasjonsforma ynskja Ludvigsen å stille spørsmål ved korleis ein behandla små utkantbygder og landbruket i Norge.

Klara Sofie Ludvigsen har si utdanning frå Kent Institute of Art and Design i England, med utveksling til Universitat Politècnica de Catalunya i Barcelona. Ho bur og jobbar i Bergen.