Viste fram resultata av to år med intens jobbing

– No har vi gått frå dei tradisjonelle båsfjøsa til lausdrift. Det har vore to år med intens jobbing, men no har vi fått ein veldig fin løysing, fortel Svanhill.

Ho og familien har jobba hardt for å få på plass det nye fjøset. Parallelt med at Fjøssystemer har laga fjøsdelen i det nye bygget, har familien Haugland bygga silo innomhus i same bygg.

– Vi traff fjell ca. to og ein halv meter under her, og måtte sprenga 10 meter rett ned og støypa oppover. Den er om lag 13 meter djup, fortel Øystein Haugland, eldste guten i ungeflokken til Lars og Svanhill.

Siloen rommar om lag 650-700 kubikk, og det tilseier lika mange siloballar.

– Vi håpar at vi har til våren sånn at vi kan parkera traktoren på vinterstid, seier Øystein.

Lausdrift og dyrevelferd

Svanhill og Lars overtok garden i 1995, og har drive den i gammalt båsfjøs. I det nye fjøset får kyrne liggebåsar og mykje større fridom i kvardagen.

– Den største drivkrafta var å få dyra ifrå båsfjøset til lausdrift, og det har gått over all forventing. Det er kjekt å sjå at dyra trivst så bra her oppe, no har dei større plass og sit ikkje fast i båsane sine, fortel Svanhill, og legg til;

– No har vi satt inn ungdyra som det ikkje er plass til her oppe, og no må dei stakkars stå fast i båsfjøset i sju månader før dei kjem ut på beitet. Det er mykje betre sånn som dette, dyrevelferden er veldig viktig.

I 2024 kjem det krav om at ein skal ha kalvingsbinge og sjukebinge for dyra sine, og i 2034 kjem nye krav om at alt skal vera lausdrift.

– Det er sånn med mjølk no at anten må ein satsa eller så må ein leggja ned. Eg kunne ha halde på i mi tid, men så lenge ungdommane er interesserte måtte vi satsa, kan Lars fortelja.

Robotflor

Det flotte nye bygget på Haugland har ein silodel og ein fjøsdel. I fjøsdelen har dei fått mjølkerobot, skraperobot, og 49 liggebåsar til kyrne, samt kalvingsbinge og sjukebinge. I liggebåsane er det gummimadrassar som er gode for kyrne å ligga på.

– Vi hadde ei som kalva for fira dagar sidan. Ho ville ikkje inn til kalven fordi det var så mykje betre å ligga på madrassane, ler Lars.

Robotfloren gjer ikkje berre mykje av arbeidet, men sparar straum for familien Haugland. I det gamle båsfjøset gjekk det om lag 2500 kr meir i straum enn i det nye.

– Vi har òg bestilt solcellepanel, som vi skal legga på heile taket her, så det kjem nok òg godt med, fortel Lars.

Satsinga har kosta familien Haugland ni millionar kronar, ikkje medrekna støtta frå Innovasjon Norge på to millionar.

Offisielt opna

Kjetil Olsen ifrå Fjøssystemer var den som erklærde robotfloren for offisielt opna. Han tykte det hadde vore fint å få vera med på denne prosessen ilag med familien Haugland.

– Spesielt Øystein tok veldig tidlig styring og eigarskap i prosjektet, og det tykjer eg at er veldig fint. Det er viktig at dei som skal drifta fjøset framover får eigarskap til det. No håpar og trur eg at familien Haugland har fått eit fjøs dei er nøgde med i lang tid framover, sa han i tala si.

I løpet av byggeprossessen var alle partar opptekne av at kyrne skulle ha god plass, og å skapa ein god arbeidsplass for dei på to bein samstundes.