Viste fram lokal omstillingsevne

Sjølv om det var stilt i produksjonshallen til Herde Kompositt på det som var siste dagen i fellesferien, var ikkje eigarane og leiarane logga av. Arvid Skogseide og Kristine Moldenhauer Biseth stilte for å forklara Kjersti Toppe, Nils T. Bjørke, Hans Inge Myrvold og Sara Hamre Sekkingstad det meste om livbåtar, «Egget» og omstilling i distrikta.

Kompositt

– Me har 60 tilsette no. Ti av dei oppsagte etter Palfinger-nedbemmaninga er tilbake. Me er der at me treng køyra skift no, og truleg leiga inn nokre for ein periode også. Det ser positivt ut, må me seia, kommenterte Skogseide.

Han var fabrikksjef i Ølve før han vart pensjonert, men no er han tilbake i manesjen, og det var med stor pondus han losa politikarane gjennom både fabrikklokale og plastarbeidarfaget.

– Vekt er viktig i dei fleste samanhengar, og vakuumstøyping er best på det. Ein ser at elektrifiseringa kjem på mange maritime område no, og då betyr lågare vekt større batterikapasitet, forklarte han og Biseth.

Produksjonen av «Egget» for Hauge Aqua er nybrottsarbeid for Herde Kompositt.

– Dimensjonane er store og utfordrande, men kompositt er eit fantastisk materiale. Ein kan laga alt! No er det stor etterspørsel, som betyr mangel på material. Både USA og Kina bruker mykje av desse råvarene no til blant anna vindmølleproduksjon, meinte Skogseide.

Omstilling

Med unnatak av Myrvold hadde ikkje politikarane hatt særleg orientering om livbåtar tidlegare. Dei let seg imponera av det Palfinger leverer til cruisebransjen, både livbåtar med plass til 440 passasjerar og tenderbåtar med skinnsete og høgt komfortnivå.

– Her i Ølve skal me produsera denne typen båt og nokre typar fritt fall-livbåtar på oppdrag for Palfinger. Me såg at då me byrja med dette, så såg me at her vil det ikkje bli produksjon lenge før det blir lagt ned. Skulle ein berre ha halde på med livbåtproduksjon, så hadde det ikkje vart lenge, kommenterte Skogseide.

– Tidlegare har ein vore låst til livbåtproduksjon, men no – med Egget – ser ein at me kan gjera mykje for mange andre bransjar også. Me får så mange førespurnader at me knapt har klart å ta unna alt, supplerte Biseth.

– Egget kom inn i rette tida, slik at me hadde ein stor jobb i botn, i tillegg til grunnarbeidet som me har med livbåtane, la Skogseide til.

Duoen skrytte av mange lokale samarbeidspartnarar i nærområdet.

– Det er stor kompetanse ute i distrikta. Dei tilsette her har vore veldig lette å få med på ei omstilling. Alle er med på å dra lasset, og bidrar med å finna løysinga. Det er veldig fin stemning på fabrikken, fortalte Biseth.

– Det er ein skjult produksjonsskatt me har der ute, konkluderte Myrvold med.

– Eg er opptatt av at me skal klara å utvikla samfunnet slik at me kan ha slike fabrikkar i distrikta, og framleis ha lokal kompetanse og verdiskaping, kommenterte Nils T. Bjørke til slutt.