Vis omsyn til dyra på nyttårsaftan

«Mange dyr, ikkje berre familiedyr som hundar og kattar, men også mange ville dyr og dyr i landbruket blir veldig redde av lyden av fyrverkeri», skriv dei i ei pressemelding.

Kvart år kan ein lesa om dyr som har stukke av og blitt skadd i samanheng med nyttårsfeiring.

– Fyrverkeri gjer at mange dyr blir redde og stressa og pådreg seg skadar. Hundar og andre dyr kan mista livet som følgje av stress frå fyrverkeri. Det beste ein kan gjera for dyra er å ikkje skyta opp rakettar og å passa godt på dyra rundt deg, seier veterinær og leiar i NOAH Siri Martinsen i pressemeldinga.

Mellom anna fuglar blir negativt påverka av rakettane. Dei har eit særs lite energilager og må bruka all energien sin på å overleva. På nyttårsaftan prøvar dei å flykta i panikk og slit seg ut.

– FN har erklært at verda er i ei naturkrise, der ville dyr og fuglar heile tida fortrengast og bestandane blir svekka. Vi har eit ansvar for å bevara artsmangfaldet på lang sikt og ikkje skapa utfordringar for allereie sårbare artar, skriv Martinsen.

Studiar viser at opp til 50% av alle hundar har ein form for lydsensitivitet eller lydfobi. Difor kan nyttårsaftan vera særs traumatisk for dei.

– Det finnes ca. 500 000 hundar i Noreg, og 600 000 kattar, 200 000 smågnagarar, 72 000 kaninar og mange andre familiedyr og husdyr som vil kunna oppleva det som traumatisk. Ein bør legga til rette for å redusera stress og frykt på best mogleg måte, heiter det vidare i pressemeldinga

Her kan du lesa NOAH sine råd for ein betre nyttårsaftan for familiedyr;

– Ikkje la dyra vera aleine heime.

– Pass på at hunden din får ein lang og god tur tidleg på dagen då det er lågare risiko for oppskyting av rakettar.

– Ha hunden i band i dagane før og etter nyttårsaftan. Mange skyt opp rakettar utanfor det lovlege tidspunktet og dette kan skremma hundane.

– Ikkje ta med deg hunden ut ved midnatt. Bli heller inne saman med den.

– Sørg for å halda kattar og smådyr inne.

– Dersom familiedyr ynskjer å gøyme seg bør dei få lov til det.

– Radio, TV eller liknande kan hjelpa med å dekka over lyder og å normalisera situasjonen.

– Har du dyr som er veldig redde bør du vurdera å reisa vekk til ein stad med mindre rakettar. Nokon vel å booka seg inn på hotell nær flyplassar, då fyrverkeri er forbode i desse områda.

For meir informasjon kan du besøka heimesida til NOAH.