Vireo har fått Enova-støtte til to anlegg: – Stolte og svært nøgde

I ei pressemelding går det fram at Vireo jobbar med ein strategi for å etablera sirkulære og robuste biogassanlegg i Norge. Selskapet har no nærare 600 GWh i utvikling. Desse prosjekta er hovudsakleg lokalisert i Kvinnherad, Karmøy, Bjerkreim, Farsund og Rakkestad. Dei to anlegga i Kvinnherad og i Farsund har tidlegare fått støtte, og er snart klare for bygging.

Enova har no også gitt Vireo støtte til to nye anlegg, høvesvis i Rakkestad og på Karmøy. Rudskogen Biogass i Rakkestad har mottatt 45 millionar kroner, og skal produsera omlag 110 GWh (cirka 7.136 tonn) per år med bio-LNG og 9.855 tonn med biogen CO2. Biogassen er tenkt hovudsakleg til drivstoffmarknaden.

Så snart som mogleg

Haugaland Biogass på Karmøy skal byggast i tilknyting til Hydro Karmøy, og skal produsera kring 85 GWh tilsvarande forbruket i aluminiumsproduksjonen til Hydro. I tillegg skal anlegget produsera cirka 5.800 tonn biogen CO2.

– Vi er både stolte og svært nøgde med desse tildelingane. Dette er viktige milepålar i arbeidet vårt med å etablera fornybar industri som gir umiddelbar positiv klimaeffekt. No ventar myndigheitsavklaringar, vidare detaljprosjektering og innkjøp, før bygging vert sett i gang så fort som mogleg, seier administrerande direktør i Vireo, Reinhard Lund-Mikkelson i pressemeldinga.

Vireo har kontor i Kvinnherad, Karmøy, Sandnes og Farsund.