Vintervêret prega januar

Når det kjem mykje snø, så kan det gå utover presisjonsnivået til stasjonane som måler nedbøren. Spesielt dei automatiske anlegga er ikkje alltid like presise. Eigentleg skal snøen smeltast om til vatn for at tala skal bli korrekte. Tommelfingeregelen er at 1 centimeter tørr snø tilsvarer 1 millimeter regn.

Sjølv med atterhald om at nedbørstala for januar kan vera litt feil grunna all snøen som falt, er det ingen tvil om at Matre tok i mot mest nedbør. Der vart det notert 310,1 millimeter. Omvikdalen kom på 2. plass og Ølve på 3., så det ser ikkje ut til at det har skjedd nokon vêrmessigt revolusjon i 2024 heller.

Smått utruleg

Heller ikkje i konkurransen om kven som får minst nedbør, har det skjedd store sensasjonar etter årsskiftet. Sæbøvik vann, for der kom det berre så vidt over 100 millimeter regn og snø. Valen og Rosendal sentrum følgde deretter.

Nedbørstala i januar er ganske på nivå med fjoråret. I nokre bygder vart det registrert litt meir nedbør i år, i andre litt mindre, medan det spesielt Ølve var nesten identisk.

Faktisk var det ganske mange nedbørsfrie døger i januar, heilt opp i 20, målt i Mauranger. Underlagsmaterialet viser tydeleg at månaden var todelt.

– Det var opplett fram til den 12., fortel Henrik Barthel i Ølve.

Dei historiske tala frå Hydro Husnes opplyser at januar 1996 framleis er den tørraste med sine 14,6 millimeter. I motsett retning leiar 2015 med smått utrulege 544 millimeter. Hydro kan elles informera at det den 19. januar i år vart målt 35 centimeter snø på Husnes.

Sterk vind

Temperaturane var mykje på minussida i januar. Ikkje unaturleg var den opplette halvdelen også den kaldaste. Frå 21. januar kunne bygdene i Kvinnherad stort sett nyta plussgrader. Dei fleste bestenoteringane ligg på 11-talet, medan Vang i Rosendal fleska til med 15,8 grader den 28. januar. Kaldast var Matre med minus 11,1.

Vinden er jo eit kapittel for seg i Kvinnherad, og spesielt Rosendal er utsett for nokre kolossale vindkast. Førre månad var ikkje noko unnatak. Klokka 21.30 onsdag 31. januar vart det målt eit kast på heile 46,9 meter i sekundet.

Meteorologisk institutt summerer januar opp slik: «Januar starta kaldt, og er den fjerde månaden på rad med unormalt låge temperaturar, det har ikkje skjedd på over 20 år. I tillegg var januar prega av snøkaos i sør og ekstremvêret Ingunn».

Nye stasjonar

Grenda sine lesarar kan elles merka seg at vi no har to nye målestasjonar med i tabellen vår. I Mauranger er den gamle stasjonen i Austrepollen erstatta med ein på Bondhus, medan i Rosendal har Kvinnherad Elektro sin stasjon på Vang kome med igjen, etter å ha vore ute eit par år.

Målestasjonar

Oversikten viser noteringane til følgjande målestasjonar: Ølve (Henrik Barthel), Hatlestrand (Gunn-Bente Stølen), Mauranger (Tore Bondhus), Rosendal - Eik (Jan Eik), Rosendal - Vang (Kvinnherad Elektro), Omvikdalen (Birgit Mørkve Hjelmeland), Matre (SKL), Uskedalen (Kurt Haugland), Husnes (Hydro), Valen (Jarle Håvik) og Sæbøvik (Harald Særsten).

Snitt-temperatur totalt pr. januar:

2024 0,77

2023 2,97

2022 4,25

2021 -0,42

2020 5,36

2019 2,42

2018 2,82

2017 2,72

2016 1,1

2015 3,6

2014 3,7

2013 0,5

Kjelde: Kurt Haugland, Uskedalen