Ville ha avklaring om jordvern
Eit oppslag i Grenda førde til at kontrollutvalsleiar Hans Inge Myrvold ynska ei avklaring frå kommunedirektøren og ordføraren.
Publisert
Den 24. oktober i fjor hadde PTM-utvalet (Plan, teknikk og miljø) møte. Der heldt nyvalt leiar Øyvind Hardeland (Ap), med god støtte av nestleiar Oddbjørn Kroka (H), eit innlegg om behovet for å tilretteleggja fleire byggjefelt. Han meinte det også er naudsynt å ta av dyrka mark i sentrumsnære område. To dagar seinare prenta Grenda ein heilsides artikkel med overskrifta «Ynskjer sentrumsnære byggjefelt: – Kvinnherad er i krise når vi ser på utviklinga».
Til møtet på måndag hadde leiar i Kontrollutvalet, Hans Inge Myrvold (Sp), bede om ei orientering frå kommunedirektøren og ordføraren. Konkret ynska han svar på om det faktisk hadde vore ei slik orientering i PTM, sidan det ikkje er omtala i protokollen, eller referatet som Myrvold kalla det. Han ville også vita om resten av PTM gav si tilslutning. Vidare ynska han svar på korleis kommunedirektøren forheldt seg til saka i møtet, og kva rammer og retningslinjer som gjeld knytt til jordvern i Kvinnherad.
Annonse
Programerklæring
Vikarierande kommunedirektør Gunn Berit Sandnes Fosse minna om at møtet i oktober var det nye utvalet sitt fyrste etter valet.
– Kommunedirektøren oppfatta uttalen (frå Hardeland) som ei slags programerklæring eller appell om korleis han ville jobba som leiar i denne perioden, sa ho.
Fosse presiserte også at det er forskjell på protokoll og referat.
Annonse
– Protokollen inneheld ikkje noko om innlegget, for det vart ikkje gjort noko vedtak. Kommunedirektøren held seg berre til vedtak. Kvinnherad kommune rettar seg sjølvsagt etter rammer, lover og retningslinjer, sa ho.
Heilt flott
Også ordførar Vegard Bjørnevik (H) vart utfordra til å svara.
– Eg oppfatta at dette var ein generell debatt. Men at einskilde parti og politikarar har sine ting dei vil jobba med, synest eg er heilt flott, kommenterte han.
Myrvold var nøgd med tilbakemeldingane.
– Eg registrerer av svaret at dette var eit innlegg uavhengig av sak. Her var det leiaren i PTM som kom med sine ytringar til utvalet. Det er ei viktig avklaring at det ikkje var noko realitetsbehandling i møtet, og at det berre var å rekna som eit innspel, sa han til slutt.
