Vilde tok av på nett – no blir ho turistattraksjon

Førre tysdag skreiv Grenda om det vesle kjeet Vilde. Saman med ei bøling artsfrender vart ho henta av slaktebilen, men under ei omlasting nytta ho høvet til å stikka av. Vilde sette kursen mot Kvinnherad kyrkje, der ho vart observert spankulerande oppå kyrkjegardsmuren. Slaktebilsjåføren fekk ikkje tak i rømlingen, og måtte køyra vidare med uforretta sak.

Fyrst då eigaren Øyvind Utne seinare på dagen tok med seg mora til Vilde, let ho seg lokka fram. Men då hadde Øyvind allereie bestemt at Vilde fortente å leva vidare.

Då saka vart lagt ut på Grenda si Facebook-side tok det fullstendig av, og avisa sine gamle trafikkrekordar vart knuste. Fem dagar seinare viser statistikken 4.100 likarklikk, 171 kommentarar og 50 delingar. Det aller meste av dette kjem frå folk som normalt ikkje les avisa. Kanskje endå meir imponerande er det at 7.000 personar har trykt på saka, og gjennom delingane har artikkelen potensielt nådd ein kvart million personar!

Kjeet Vilde stakk av frå slaktebilen – får behalda livet

Søkte kyrkjeasyl

I kommentarfeltet var det fleire som meinte at Vilde hadde søkt kyrkjeasyl. Elles kunne vi lesa til dømes:

– Vi ville prøvd det same.

– Klok geit.

– Kje er godt, men unner flinke Vilde eit fint liv.

– Hurraaa for Vilde som gjorde det einaste rette.

– Fornuftig og snartenkt, må sjølvsagt få leva.

– Ei klok Geit. At ho får behalda livet? Skulle berre mangla.

Og frå Synnøve Solbakken:

– Kjekk historie. La kjeet Vilde få leva det gode liv i Rosendal, ser den allereie har funne seg til rette!

Det var også tendensar til debatt.

– Er det faktisk slik at folk meiner ho visste at det var ein slaktebil? Og at slaktebilen fører til avliving? At det var derfor ho stakk? Folk er ute av kontroll.

Kor på svaret kom raskt:

– Dyr luktar og merkar meir enn ein trur, ikkje undervurder dyra sine evne og følelser.

Veldig gøy

Gardbrukaren sjølv, Øyvind Utne, er overvelda over responsen.

– Det er litt overraskande, men veldig gøy. Men av og til skjer det at ting tek heilt av. Dette viser at folk ynskjer gode og koselege historier om dyr, seier han.

Garden Nordbø på Nes i Rosendal er ein besøksgard. Fem gonger i sommar hadde dei open gard der folk kunne koma og helsa på dyra, samt å sjå det gamle klebersteinsbrotet i sjøkanten. Heretter vert Vilde ein del av opplegget.

– Med historia til Vilde, er det heilt openbart at ho må bli ein av attraksjonane. Vi må jo ta Vilde med i marknadsføringa, i tillegg til alpakkaene, geoparken og resten hjå oss. Mellom anna må leggja opp til at barnefamiliar kan koma på besøk for å mata Vilde, opplyser Øyvind Utne.

TikTok

Men kanskje blir Vilde kjendis også. For inspirert av Hakallegarden på Sunnmøre, som gjer stor suksess på TikTok og tiltrekkjer seg gjester frå heile landet, kan det vera at også Vilde hamnar på sosiale media.

– Ungane masar om å få TikTok, men det er ikkje aktuelt. Men eg har tenkt at vi gjerne bør laga ein gards-TikTok, så då er det ikkje usannsynleg at Vilde blir ein del av det, smiler Øyvind Utne.