Vil tilpassa barnehageåret etter skuleruta

Kvinnherad kommune samarbeider med kommunane i Sunnhordland, gjennom Forum for oppvekst i Sunnhordland (FOS), om skuleruta. Sidan regionen delvis er ein felles bu- og arbeidsmarknad, og i tillegg har eit fagleg samarbeid, er det eit mål at kommunane i stor grad har felles skulerute. Denne blir vedteke for to år om gangen.

I kommunestyret for halvanna veke sidan låg det føre framlegg til ny forskrift. Den vart samrøystes vedteke. Men Elise Stava Vangdal la fram eit tilleggsforslag på vegner av Senterpartiet. Ho opplyste at det kan vera krevjande for foreldre som har ungar både i grunnskulen og i barnehagen når barnehagen legg planleggingsdagar rett etter at elevane er tilbake på skulen etter sommarferien.

– Sånn var det for mange i år. Skulen hadde tre dagar planlegging veka før skulestart, medan barnehagen hadde to dagar etter skulestart. Dei gongene ein har prøvd å ta det opp med barnehagane, får ein til svar at barnehageåret startar 15. august, og difor kjem planleggingsdagane etter det. Er det råd å tilpassa barnehageåret etter skuleruta? undra ho.

Forslaget hennar lydde: «Barnehagane i Kvinnherad kommune følgjer skuleruta, barnehageåret skal tilpassast etter denne». Dette vart vedteke med 34 mot éi (Jostein Saghaug, MDG) røyst.

Medverknad

Bjørn Olav Tveit (Ap) la fram eit anna tilleggspunkt.

– Det er viktig med medverknad, både frå foreldre, tilsette og elevar. Eg fann ikkje det omtalt i saka, sa han, og føreslo: «Dei nye rutinane skal ikkje redusera tilsette, elevar og føresette sine moglegheiter til å medverka i utarbeidinga av Kvinnherad si skulerute». Dette vart samrøystes bestemt.