Vil ta i mot fleire flyktningar

Kvinnherad kommune seier ja til å ta i mot 10 flyktningar i 2021. Men kommunestyret vedtok å opna for ytterlegare 20.

Vedtaket om 10 flyktningar inkluderer ikkje familiesameinte. På vegner av Høgre tok Knut Johannes Helvik ordet.

– Vi har kome til den erkjenninga at dette både er så positivt og så viktig at vi vil koma med eit tilleggsforslag. Erfaringa med flyktningane er veldig god. Vi ser at integreringa blir betre og betre, og at det er høg kompetanse på dei som kjem. Utanom det humanitære aspektet, ser vi òg på flyktningane som ein ressurs, sa Helvik.

I forslaget står det at Kvinnherad er i stand til og ynskjer å busetja 20 flyktningar, i tillegg til dei ti.

– Eg er veldig imponert over Høgre her. Det er eit godt forslag og ein god argumentasjon som eg støttar fullt ut, kommenterte Hege Lægreid Røssland (SF).

Vibeke Fredheim (Ap) undra korleis ein har tenkt å nytta flyktningane sin kompetanse, og trur ikkje ein gjer det godt nok i dag.

– Veldig mange av dei som kjem, både kvinner og menn, jobbar som reinhaldarar, opplyste ho.

Høgre sitt forslag vart vedteke mot tre røyster (to frå Frp, éi frå Høgre).