Vil starta planarbeid for Ølve industribase

Firmaet Ølve Bruk AS vart etablert allereie i 2006, med føremålet «drift av og investering i oppdrettsverksemd og alt som har samanheng med dette. Investera i anna industriverksemd, skip, eigedom og aksjar og/eller andelar i selskap med liknande verksemd». Styreleiar og dagleg leiar er ikkje ukjende Gerhard Meidell Alsaker frå Tysnes. I styret sit også økonomidirektøren i Alsaker Fjordbruk AS, Helge Mandius Nesse, og driftsdirektør Hans Helge Vik. Sistnemnde er frå Fjelberg og også dagleg leiar i Fjelberg Fjordbruk AS.

Kjøpte tomter

No ynskjer Ølve Bruk AS å setja i gang med planarbeid for utvikling av eit næringsområde i Ølve, det som dei kallar Ølve industribase. Gjennom konsulentselskapet ABO plan & arkitektur har dei sendt søknad til kommunen om oppstartmøte. Føremålet med planen er å detaljregulera næringsføremål knytt til eksisterande verksemder, samt sjøretta næring for mellom anna landbasert oppdrett, deler av leidningstrasé i sjø, samt tilhøyrande infrastruktur for vegtilkomst.

Bakgrunnen for prosjektet er at Meidell-/Alsaker Fjordbruk-konsernet sommaren 2023 kjøpte areala der Herde Kompositt og Palfinger held til i dag. Same haust avtalte dei kjøp av ei tomt som i kommuneplanen er oppført som ubygd næringsføremål.

«Desse tre eigedomane er planlagt å vera hovudbruka i Ølve industribase. I tillegg inngår Ølve Industrier i planområdet, som har drive verksemd på staden sidan 1980. Frå før eig Ølve Bruk AS areal inst i Hyttevågen, der dei tidlegare har hatt løyve til akvakulturproduksjon sidan 1983», står det i planinitiativet.

Reetablera produksjon

Utgangspunktet til tiltakshavar er ynsket om å relokalisera tidlegare akvakulturproduksjon frå inst i vågen til deler av området omtala som Ølve industribase, samstundes som planen også tek høgde for andre maritime og sjøretta føremål. Dei ser for seg å reetablera produksjon i Ølve, utifrå at Meidell konsernet/Alsaker Fjordbruk AS ynskjer å sikra sine matfiskanlegg i sjø med smolt av god kvalitet frå eigne anlegg.

«Yngel- og smoltproduksjon er også eit vesentleg forretningsområde for konsernet, då dei i tillegg har langtidskontraktar for levering til eksterne kundar. Ølve Bruk sitt ynske for området er å utvikla areala i industribasen til smoltproduksjon og annan maritim verksemd. Dette vil gi positive ringverknadar for Ølve, kommunen og omegn», står det.

I planinitiativet vert det understreka at dagens næringsaktivitet er planlagt vidareført slik som areala er brukt i dag. Planar om landbasert oppdrett er ynskeleg på eigedom gnr. 12/167, men realiseringa av dette avheng av om det vert gitt konsesjon til det. Ein ynskjer difor ein fleksibel plan der smoltproduksjon kan vera ein mogleg utnytting av arealet.

Planområdet er om lag 146 dekar stort i alt.