Vil snakka om biblioteket si framtid
Måndag 10. juni inviterer biblioteket til eit folkemøte for å snakka om korleis biblioteket skal sjå ut i framtida, der dei ynskjer innspel frå brukarane.
– Det spesialdesigna biblioteket vårt fyller 36 år i løpet av året, og var eit moderne bygg då. Sidan har samfunnet endra seg, publikum har endra seg, det har kome nye statlege lovar og føringar og samfunnsoppdraget vårt har endra seg, seier biblioteksjef Trude Hege Bergesen i ei pressemelding.
Mogen for utskifting
Annonse
– No er det snakk om biblioteket som arena og møteplass, og det er meir fokus på formidling. Mange bibliotek har ubetente opningstider i tillegg til betent opningstid. Det har også me. Dette fører til å at me når nye brukargrupper, og det oppstår nye behov. Biblioteket har vorte mykje meir enn ein stad å låna bøker, fortset ho.
I fylgje biblioteket er den gamle bibliotekplana frå 2014 og mogen for utskifting. Dei ynskjer å sjå framover og høyre med brukarane kva behov og ynskjer dei måtte ha. Biblioteksjef Trude Hege Bergesen vil orientera om arbeidet med bibliotekplana, samt at leiar i bibliotekutvikling Vestland Elin Golten kjem og skal halda eit innlegg.
– Golten har doktorgrad i biblioteket som møteplass. I tillegg kjem også Rustne menn for å bidra musikalsk. Me spanderer lunsj, kaffi og kake, lovar biblioteksjefen.
