Vil selja Gjøa Sjømat: – Det er for høgt arbeidspress, eg føler ikkje at eg strekk til
Åge Sørensen (63) understrekar at det ikkje er noko dramatikk rundt avgjersla. I høgsesongen blir det rett og slett for hektisk til å vera til stades både på Fisketorget i Bergen og i Rosendal.
Publisert
Sist oppdatert
Sørensen håpar no at nokon med kjennskap til restauranten og konseptet vil satsa vidare.
– Vi vil halda ope, og eg vil vera tilgjengeleg i ein overgangsfase som konsulent dersom det er ønskjeleg. Eg er jo interessert i å ha dette tilbodet sjølv, og det har jo vist seg å vera svært populært for lokalbefolkninga òg, seier han, før han understrekar at det ikkje er snakk om å leggja ned.
Annonse
63-åringen, som opna dørene til Gjøa Sjømat i mai 2021, likar å jobba og vil halda det gåande så lenge han kan stå på beina og har eit klart hovud.
Men månadane i sommarhalvåret blir for hektiske til at han maktar å vera det vertskapet som han ynskjer. I tillegg til å vera tilstades på Fisketorget og på Gjøa, produserer han kaviar.
– Høgsesongen fell jo på same tid for både Gjøa og Fisketorget, og då kjenner eg at eg ikkje strekk til nokon av plassane. Eg klarar ikkje å dele meg, seier han.
Vertskap
Annonse
Han meiner ein restaurant som Gjøa bør ha eit vertskap som er tilstades i det daglege, både for drifta og for kundane sin del. Dette vonar han at dei eller den komande eigaren vil ha moglegheit til og interesse for.
Ein kjenning av Sørensen kjem syklande forbi den solfylte uteserveringa.
– Kor har du vore heile sommar? spør ho, og får eit joivalt svar frå den blide bergensaren i retur.
– Der ser du, «Kor har du vore i sommar», seier han då ho syklar vidare, og held fram.
– Eg har nesten ikkje vore her i sommar, det merkast.
Den vesle episoden stadfestar poenget hans om at han ikkje har vore det vertskapet han helst hadde ynskja å vera på Gjøa denne sommaren.
Annonse
– Går mot normalsesong
Årets sommarsesong for Gjøa har elles vore god, men ikkje like god som fjoråret. Dette kjem av tre ting meiner fiskehandlaren; vêret, ynskje om å reisa etter korona og høge drivstoffprisar.
Tidspunktet for å leggje drifta for sal meiner han likevel er godt, ved at dei nye eigarane vil kunne få ein god start med julebordsesongen.
– No vil det bli ein normal julebordsesong, og turistsesongen for Rosendal vil nok stabilisera seg òg, eg trur det skjer neste sommar, spår Sørensen.
Mogleg potensiale for utviding
– Tidlegare i sommar søkte de om å utvida her. Korleis blir det med dei planane no?
Annonse
– Vi ventar svar på søknaden no snart, men vi kjem ikkje til å gjera noko med det, det får bli opp til dei som tek over, seier Sørensen.
Planane dei har lagt føre i søknaden om utbygging vil gjera det mogleg å utvida uteserveringa til å gjelda heile framsida av bygningen. Likeeins vil sushi-kokken kunne flytte opp frå kjellaren og få sin arbeidsstad i førsteetasjen.
Den vertikale utvidinga som er omsøkt, med ein ekstra etasje i høgda, er det Gjøa Eigedom som står for. Den har såleis ikkje noko med restauranten eller drifta av denne å gjera.
