Vil seia nei til Espira: – Har allereie overkapasitet
Skal Kvinnherad overføra tre millionar kroener meir i året til Espira Halsnøy Kloster barnehage, når det er overkapasitet på barnehageplassar på Husnes? Nei, meiner Hege Lægreid Røssland (SF).
Publisert
Sist oppdatert
To gonger tidlegare har politikarane i Kvinnherad sett foten ned for Espira Halsnøy Kloster barnehage på Halsnøy sine utvidingsynske. Hege Lægreid Røssland (SF) meiner dei torsdag må gjera det for tredje gong.
Espira søkjer om utviding for 12 små barn. Det betyr i praksis 24 plassar, då eitt- og toåringar tel som to barn i barnehagesamanheng. Skulle kommunestyret enda med å seia ja til utviding, betyr det ein auke i kommunen sine overføringar til Espira på 3,2 millionar kroner. Samtidig har ein ledig kapasitet i barnehagane på Sunde og Husnes, går det fram av saksutgreiinga.
Annonse
– Har overkapasitet
– Eg ynskjer ikkje å vera med på å bruka så mykje pengar ekstra, utan at det kjem nokon barn til gode. Det vil det ikkje gjera, fordi ein allereie har overkapasitet på barnehageplassar i Kvinnherad. Parallelt er det eldreomsorga som må ta dei store kutta, der me snakkar om 50 millionar ned på ganske få år, seier Hege Lægreid Røssland om den føreståande saka.
– Eg støttar kommunedirektøren si innstilling om avslag, sjølv om det pr. no er barn på venteliste ved Espira barnehage. Det har gledeleg nok vore ein babyboom på Halsnøy, men me har ein overkapasitet på barnehageplassar i Kvinnherad. Ein kan ikkje forventa at alle alltid skal få førstevalet sitt det første barnehageåret, seier Røssland.
Ho viser til at det har vore tilsvarande venteliste både i Bringedalsbygda og Omvikdalen.
Annonse
– Fødselstala går ned i Kvinnherad, og det er tilstrekkeleg kapasitet i fleire av barnehagane våre, både i kommunale og private. Ved ei eventuell godkjenning av fleire barnehageplassar i Espira Halsnøy Kloster barnehage, kan ikkje kommunen gjera reduksjon i godkjenninga ved seinare høve, påpeikar saksutgreiinga.
– Det er eit stort årskull som går ut av Espira Halsnøy Barnehage neste vår. Det vil frigjera mykje kapasitet i barnehagen der frå hausten 2022. At barna første året får tilbod om plass i barnehage i ei nabobygd første året, er det rette å praktisera for Kvinnherad, meiner Røssland.
