Vil samla kvinnheringar som bur i Oslo: – Kan bli ei nyttig investering

Saman med utflytta kvinnheringar håpar Kvinnherad Næringsservice (KNS) å laga ein fast treffstad for sambygdingane i hovudstaden, og har gått ut både på Facebook og Linkdin for å spreia ordet.

– Eg blei kontakta av Kjetil Tvedt som jobbar og bur i Oslo, som lurte på om vi kunne arrangera eit slikt treff, basert på eit ønske frå også andre kvinnheringar. Det ville vi sjølvsagt, fortel Bente Marie Sjo ved Kvinnherad Næringsservice.

Ein tradisjon

Arrangementent skal haldast ved utestaden Bakgården på Løkka torsdag 13. februar, og Sjo håpar at dette kan bli noko som kan bli arrangert med jamne mellomrom.

– Målet vårt er at kvinnheringar skal møtast, til tross for at dei ikkje er heime i kommunen, legg ho til.

Lokkar bedriftene

Tilstelninga er uformell, men nyttig, ifølgje Sjo.

– KNS skal også delta på arrangementet, der vi skal presentera oss sjølve, men også ein del kvinnheradsbedrifter, for å visa nokre av dei spennande arbeidsplassane Kvinnherad har å by på, samt at det er noko kjekt å koma heim til for dei som eventuelt vurderer det, forklarar ho.

Sjo håpar at å treffast fysisk for å fortelja litt om kva som rører seg her heime, kan ha ein positiv effekt.

– Vi ønsker også å invitera med oss alle bedrifter som vil bli med oss frå Kvinnherad. Det kan bli ei nyttig investering dersom ein kan klara å rekruttera heim ein kvinnhering eller to, lokkar Sjo.