Vil rusta opp Undarheim skule

Høgre meiner det er på tide å rusta opp skulane. Partiet ynskjer å starta med Undarheim skule på Husnes.

I budsjettforslaget som Høgre vil leggja fram i kommunestyret torsdag kveld, står det eit punkt om nybygg/rehabilitering av Undarheim skule.

– Alle parti går inn for vedlikehald av skulane, men vi meiner vi no må byrja med ein skule, og då er det naturleg å sjå på Undarheim fyrst. Både fordi det er den største skulen, men òg fordi dette må sjåast i samanheng med at Kvinnherad Arena no skal byggjast og med utviklinga av regionsenteret Husnes, seier formannskapsmedlem Signe Torill Skogseth.

Kommunestyremedlem Silvia Tofte er heilt samd.

– Undarheim har lidd av at ein heile tida har avventa moglege nedleggingar av andre skular. Men vi har eit vedlikehaldsbudsjett, og det bør vi bruka av til å rusta opp Undarheim. Så får ein samstundes planleggja for at det kan verta behov for å utvida seinare, og gjera opprustinga på ein slik måte at det er enkelt å byggja på eit anna tidspunkt, fortel ho.

 

Ingen strukturdebatt

Begge understrekar at utspelet ikkje har noko med den komande strukturdebatten å gjera.

– Nei, vi vil ikkje gå inn på nokon strukturdebatt. Vi gjekk jo til val på å ikkje leggja ned skular så lenge Fau og foreldre er imot det, seier Skogseth.

– Vi er for at skular skal leggjast ned eller slåast saman på initiativ frå Fau, men ikkje basert på eit politisk vedtak. Vi meiner at skulen på Husnes må bli betre no, legg Tofte til.

Politikarane konkluderer at det er Undarheim som bør prioriterast, også fordi det er denne skulen som har det største vedlikehaldsbehovet utifrå oversikten som kommunen har utarbeidd.

– Vi må jo berre starta ein plass. No må vi byrja å rusta opp skulane, slår Signe Torill Skogseth fast.

I går var partikollega Leif Sverre Enes i full gang med å leggja siste hand på budsjettforslaget til Høgre. Han utdjupar kva partiet konkret meiner med formuleringa «nybygg/rehabilitering».

– Det er ein stor del av skulen som er fullt brukande, men òg ein stor del som ikkje er brukande. Korleis dette kan løysast får det vera opp til fagfolk å avgjera, seier Enes.