Vil prioritere «Nye Sunnhordlandstunet», men...

Då fylkestinget handsama årsbudsjettet under tingsetet i Rosendal denne veka understreka dei at prosjektet med det nye adminstrasjons-senteret til Sunnhordland Museum er ein prioritet som dei ynskjer å sjå realisert.

Prosjektet omfattar både nybygg samt ombygging av eksisterande bygningsmasse på Stord.

Sunnhordland museum forvaltar fleire bygningar og tun i Kvinnherad; Halsnøy kloster, Nistovetunet (Omvikedalen), Jens Tvedt-huset (Omvikedalen) og Gjerdetunet (Mauranger). Kvinnherad kommune er såleis ein av kommunane som er knytt til museet, og som no er venta å bidra med sin del til finansieringa.

Bakgrunn

Tilbake i 2020 gjekk Sunnhordland museum ut med eit innspel til kommunane i regionen, der desse vart oppmoda om å gje økonomisk støtte til prosjektet. Her vart Kvinnherad kommune beden om å støtta museet med 2 millionar kroner, ein sum som var basert på ei fastsett støtte på 155 kroner per innbyggjar.

Vinteren 2021 orienterte museumsdirektør Linda Øen formannskapet om planane, i håp om at kommunen skulle finna ekstra midlar å løyva til at prosjektet, utan at det så langt har bore frukter.

I budsjettinnspelet for 2022, som museet har sendt til kommunane i Sunnhordland, vert det peika på kva rolle institusjonen har i regionen.

Sunnhordland museum har eit definert ansvar som regionalt ansvarsmuseum. Det inneber at dei kan bidra med rådgjeving innan musealfaglege spørsmål til mellom anna private og kommunale samlingar. Museet jobbar aktivt med å samla inn, bevara og formidla kunnskap om og til heile Sunnhordlandsregionen. Nasjonale og regionale stønadsordningar legg opp til at finansiering av drift og prosjekt i museumssektoren skal byggja på eit spleiselag mellom stat, fylke og kommune. Det er Sunnhordland museum si vurdering at det er avgjerande for realisering av prosjektet at kommunane i Sunnhordland stør opp om prosjektet økonomisk og deltek i spleiselaget.

Likevel er det berre kommunen som husar administrasjonsbygget som har gått inn med finansiering til «Nye Sunnhordlandstunet».

«Per i dag er det berre Stord kommune som har gått inn med midlar til dette», stadfestar Øen i ein sms.