Vil jobba for inkluderande russetid
Mia Fredriksen frå Halsnøy er den nye russepresidenten på KVV, etter ein litt uformell valprosedyre. Ho vil arrangera kjekke arrangement for russekullet, som kan inkludera alle.
– Det var eigentleg ingen som stilte til val som russepresident. Ingen vil stilla, og så tapa, det hadde iallfall ikkje eg likt. Men alle som ville vera russ møttest, og me diskuterte litt, og så var det mitt namn som vart mest nemnt av dei andre. Så då vart det meg.
Den ferske russepresidenten er klar for oppgåvene som ventar. Ho vil at alle skal kjenna seg velkomne på russearrangementa. Sjølv om ho skildrar miljøet på KVV som godt, meiner ho likevel at nokon blir gåande litt utanfor.
Annonse
Alle er ønska
– Det som er litt vanskeleg med russetida er at alle er velkomne, men det er likevel ikkje alle som føler seg velkomne. Det er ikkje alle som har ei gruppe å gå saman med.
Det er ulike løysingar på denne utfordringa, meiner Mia. Ho vil gå aktivt ut til kvar enkelt og prøva å få dei med på det som skjer.
– Me må prøva å få til at alle kjenner seg ønska. Og så vil me laga til ulike arrangement som kan passa for alle, det treng til dømes ikkje vera innblanda alkohol på alt som skjer.
Annonse
Frå regjeringa si side ligg det an til at dette bli det siste året der eksamen kjem etter russefeiringa. No er det ein diskusjon om eksamen skal flyttast til tidlegare på året, eller om russefeiringa skal koma seinare. Utdanningsforbundet ser det som vanskeleg å flytta eksamenstida, sidan dei skal koma gjennom eit pensum. Men Mia er klar på kva som hadde vore best for elevane.
Ei tid for samhald
– Eg ville hatt eksamen i april, sånn at russetida kunne begynt i starten av mai. Russetida må kunna knyttast til 17.mai. Det å ha på seg raud eller blå dress om sommaren blir litt dumt, seier ho.
Halsnøybuen ser fram til russetida. Saman med russestyret skal ho arrangera både halloween-fest, kahoot-konkurransar og innsamling av pengar til kreftforeininga og psykisk helse. I tillegg skal ho ha god kommunikasjon med både skulen og politiet. Ho meiner det er ei viktig tid.
– Det handlar om å tilbringa den siste tida av skuletida med vennene og årskullet sitt. Til neste år blir me jo spreidd rundt overalt, og det er jo ikkje sikkert me har kontakt så ofte lenger. Så det er ei tid for samhaldet mellom oss.
– Blir det revy?
Annonse
– Ja, me har to revysjefar, Leah Mo og Hava Eldi. Så det blir spanande å sjå kva dei finn på. Det er nok mykje arbeid. Sjølv er eg ikkje noko revymenneske akkurat, men eg må no vera med på noko, sikkert, ler ho.
