Vil jobba for bru mellom Fusa og Os
Sjølv om det ligg eit stykke utanfor Kvinnherad sine grenser, vil ei eventuell bru mellom Venjaneset og Hatvik ha mykje å seia for innbyggjarane våre.
Nyleg var politikarar frå Bjørnafjorden Høgre aktive med å driva valkamp på ferja mellom Venjaneset og Hatvik. I programmet som dei delte ut, står det nokre punkt under temaet «Samfunnsutvikling» som også kan ha interesse her lokalt:
* Starta arbeidet med utgreiing av ferjefritt vegsamband mellom Os og Fusa.
Artikkelen held fram under annonsen.
* Arbeida strategisk og målretta opp mot Vestland fylkeskommune for å få gjennomført tiltak på fylkesvegane i kommunen, mellom anna «gul stripe» mellom Osøyro og Eikelandsosen.
* Arbeida aktivt for å få Hordalandsdiagonalen E134 gjennom Fusa.
To alternativ
Då Terje Søviknes frå Framstegspartiet var i Kvinnherad på tysdag, opplyste han at det i Bjørnafjorden er eit tverrpolitisk ynske om bru, og at det var bestilt ei utgreiing allereie før kommunesamanslåinga i 2020. Men han tykkjer dei som har styrt dei fire siste åra har gjort lite med saka.
– Viss Høgre og Frp vinn valet i Bjørnafjorden, så blir det nok sett i gang ei utgreiing. Det er to alternativ vi vurderer; enten ei vanleg bru lenger inne i fjorden, eller ei flytebru med skipspassasje omtrent mellom Hatvik og Venjaneset, sa han til Grenda.