Vil invitera fylket på busstur til Utåker

I kommunestyremøtet på torsdag orienterte Leif Sverre Enes (H) forsamlinga om noko av det han har jobba med i det siste. Mellom anna har han vore med på ein busstur til Utåker; dette er at bussen ved to høve i midten av mars hamna i grøfta på den smale vegen. Innbyggjarane i området uttrykte då stor frustrasjon og kjende seg nedprioriterte av kommunen.

– Det er vanskeleg å ikkje vita om ungane kjem seg på skulen eller ikkje. Vi vart lova at vegen skulle bli utbetra då skulen på Utåker vart nedlagd tilbake i 2000, men det har ikkje skjedd, sa Håkon Askeland til Grenda.

– Me føler oss nedprioriterte

Leif Sverre Enes forstod frustrasjonen etter synfaringa si.

– Eg trur ikkje eg hadde våga å sitja på med den bussen vintersdagen, for det var millimeterpresisjon. Så dei vegane der ute lyt det gjerast noko med. Det er klart det er lange strekningar, men vi må i alle fall føreta nokre avbøtande tiltak så snart som mogleg, med møteplassar, sikring, grøfter og den type ting. Det er ikkje forsvarleg, slik eg ser det, å køyra stor buss på dei vegane der, opplyste han.

Eit rettmessig krav

Enes slo fast at store delar av vegane i Kvinnherad er i særdeles dårleg stand. Difor har han og ordførar Hilde Enstad (Ap) tenkt å invitera vegeigaren, som er Vestland fylkeskommune, på besøk.

– Og så tek vi ein køyretur, ein skrangletur gjennom kommunen vår for å sjå på den vegstandarden som er her. Det er nokre strekningar som er gode, men det er frykteleg mykje dårleg veg. Etter vintervedlikehaldet med salting og brøyting så har det i alle fall ikkje vorte betre, sa han.

Knut Johannes Helvik (H) støtta initiativet. Han la til at Kvinnherad har svært mykje fylkesveg, faktisk 9% av heile fylkesvegnettet i gamle Hordaland.

– Samtidig les vi at fylkeskommunen har gjort det veldig bra, spesielt det siste året. Dei har sett av 500 millionar kroner ekstra til fylkesvegar dei tre neste åra. Eg oppmodar om at vi verkeleg står på for å få tak i mest mogleg av dei pengane. Det meiner eg er eit rettmessig krav som vi må stilla i lys av dei elendige fylkesvegane, analyserte han.

Buss av vegen på Utåker

Snedig forslag

Vibeke Fredheim (Ap) tykte det er veldig bra å invitera vegeigaren på besøk, og hadde samstundes eit snedig forslag.

– Viss dei kjem frå Bergenskanten, så håpar eg at vi nyttar sjansen og krev at dei må følgja Skyss sine bussruter til Kvinnherad, meldte ho.

Øyvind Hardeland (Ap) fryktar at fylket vil seia at dei ikkje har pengar til å gjera noko.

– Kvinnherad er diverre i ein uheldig situasjon, sa han og viste til at kommunen er ein av få som stort sett har fylkeseigde hovudvegar.