– Vil ikkje låsa posisjonar

– Me starta samtalar i går, og eg opplever det som gode samtalar. Det er på eit veldig overordna sonderingsnivå. Det er god tone og god semje om potensiell oppskrift for vidare samarbeid. Det blir samtalar etter møtet i kveld, seier Hans Inge Myrvold til Grenda tysdag formiddag.

Senterparti-profilen er tydeleg på at det blir interessant å sjå kor dei går vidare i samtalane med Høgre og Arbeidarpartiet.

– Kor viktig er det for dykk å koma i posisjon?

– Me er opptatte av å oppfylla fleire av dei politiske sakene våre. Det gjer me best med å koma i posisjon. Best mogeleg utteljing for våre saker er den viktigaste jobben, og 2015- og 2019- oppgjera viser at me er gode på det. Eg kjenner veldig på at me skal forvalta dei 880 stemmene frå Sp-veljarane inn i ein forhandlingssituasjon, forklarer Myrvold, som leiar forhandlingsutvalet til Sp.

Heilskapen

Senterpartiet enda på fem mandat måndag kveld, medan Høgre og Arbeidarpartiet hamna ut med høvesvis ni og seks plassar i kommunestyret.

– Eg tolkar dei innleiande samtalane som særs positive, så det treng ikkje ta lang tid. Eg trur mykje kan vera klart i løpet av veka, seier forhandingsleiaren.

– Kva er sagt om ordførarposisjonen?

– Eg registrerer at Høgre er tydelege i dette spørsmålet. Dette er ein vesentleg del av forhandlingane. Eg skal vera veldig varsam om å uttala meg om dette no. Det er heilskapen me forhandlar om, inkludert ordførar og varaordførar. Posisjonar og oppgåver og politikk, summen av dette avgjer for oss, seier Myrvold.

Den tidlegare ordføraren seier sjølv at han ikkje låsar av nokon posisjonar.

– Eg registrerer at H har eit sterkt utgangspunkt, men eg har ikkje lyst å slå to strekar under svaret på noko enno, korkje ordførar og varaordførar, sluttar Myrvold.