Vil ikkje endra skulestrukturen

Politikarane er jamt over samstemte om å ikkje endra skulestrukturen slik kommunedirektøren har lagt fram forslag om i økonomiplanen.

På sakslista til det ekstraordinære formannskapet på torsdag var det i utganspunktet berre ei sak på lista; budsjett og økonomiplan.

– Eg kunne tenkt meg at me kunne lagt fram eit budsjettforslag, men det har vi ikkje no. Så då set me fram kommunedirektøren sitt forslag, så vil me jobba vidare fram mot kommunestyret og ber difor om meir tid, sa Gunnar Våge (Sp) og fortsette:

–  Men det me kan seia er at me har funne pengar når det kjem til endringane angåande barnehagar og skular. Me vil ikkje vera med på å leggja ned noko. Me vil ha ein god og grundig prosess med høyring for alle. Det blir heilt feil å gjera noko med skulestrukturen i samband med budsjettet. Det blir ikkje strukturendring no, sa Våge tydeleg.

 

Uheldig debatt

Ove Lemicka (FrP) meiner budsjettprosessen har skapt mykje uro angåande skulane.

– Det er uheldig å skapa tvil. Det er ikkje heldig å ha desse skuledebattane gong på gong. Ein er nøydd å gjera noko for å leggja til rette for vekst og å få folk til å villa flytta heim. Vi må gjera bygdene attraktive, sa Lemicka.

Hege Lægreid Røssland (SF) meiner ein må sjå på korleis ein kan få gode oppvekstvilkår.

– Det skal vera godt for dei som bur her, men òg attraktivt for tilflyttarar, sa Røssland.

– Skulane er òg ei investering for framtida. Eg snakka nyleg med ei frå Herøysund som flytta dit i si tid nettopp på grunn av skulen der. Rett etterpå byrja debatten om nedlegging. No er borna hennar store, men ho levde i frykt alle åra borna gjekk på skulen. Det er uheldig med denne eviggåande debatten. Det skapar usikkerheit, sa Silvia Tofte (H)

Tofte viste òg til at elevtalet på Øyatun er i vekst, og at Halsnøy generelt er i vekst no.

– Det meste er sagt frå vår side frå Hege og Gunnar. Kvalitet på skulane er veldig viktig. Det må vera ein sentral del av det heile. Viktig å gje ungane vår dei beste føresetnadane, sa Leif Ove Mikkelsen (Ap)

Marit Årthun (KrF) vil ikkje ha få og store skular og var tydeleg på at Krf ikkje vil leggja ned skular.

 

Sunt med debatt

Synnøve Solbakken (Ap) meiner at ein debatt om skulestruktur kan vera sunt.

– Eg tenkjer det er fordelar og ulemper når det kjem til samanslåing. Det er ein fordel med større miljø og innhald i skulen med eit aktivt og godt læremiljø. Eg trur vi treng ein ny skule. Så er eg òg heilt sikker på at det å få auka folketalet har med kommunikasjon inn og ut av kommunen. Det må verta enklare å bu her og pendla inn og ut av kommunen, sa Solbakken.

– Eg er einig at det er sunt med debatt, men at den er så gjentakande trur eg ikkje er bra. Og på Øyatun, der elevtalet er i vekst, då handlar det berre om økonomi, sa Lemicka.

– Elevane på Øyatun har fått skissert ny flott skule attmed ein flott idrettshall, men dei seier framleis nei. Ein må ta elevane sitt ønske med i vurderinga, sa Tofte.

Ove Lemicka la fram eit budsjettforslag frå Kvinnherad FrP.

– Vi har gått grundig til verks for å gjera endringar på kommunedirektøren sitt forslag, og har henta ganske mykje pengar, sa Lemicka.

Mellom anna meiner FrP at kommunen eig for mange eigedomar og kan selja desse for 10 millionar årleg. I tillegg meiner dei at kommunen kan spara 10 millionar på å stramma inn på stillingar. Kommunedirektøren si innstilling vart vedteke, med forbehald om endringar, med åtte mot Ove Lemicka som stemte på FrP sitt budsjettforslag.