Vil ikkje at busetjing av flyktningar skal handla om skulestruktur

Kvinnherad kommune legg opp til å busetja flyktningane frå Ukraina på Husnes.

Då kommunestyremøtet fekk ei orientering om arbeidet med å ta i mot flyktningar frå Ukraina, spurde Silvia Tofte (H) om det faktum at nokre skular har betre plass enn andre får noko å bety i den samanheng.

– Vi ynskjer å busetja konsentrert og i nærleiken av tenestene. Det vil seia på Husnes, i alle fall med tanke på at dette i utgangspunktet skal vera kortsiktig. Der har vi Nav, transportkapasitet, skular og barnehagar, svarte kommunedirektør Ragnhild Bjerkvik, før ho la til:

– Eg håpar ikkje dette blir ein debatt om skulestruktur eller om bygdene. Vi må sjå korleis vi kan ivareta desse flyktningane på best mogleg måte.

Gaute Lund (SF) var inne på same sporet som Tofte.

– Det er bygdene som skal ta vare på desse flyktningane. Vi må syta for at alle bygder får bidra, rådde han til.