Vil ha Kvinnherad med på Hardanger-domstol

Hardangerrådet har etter medieoppslag i år sett seg nøydd til å supplera og forsterka fråsegna i høyringa om domstolsstrukturen, som vart send i fjor vår. Rådet hevdar at fleire saker med verneting i Hardanger det siste året er flytta frå Lofthus til Bergen.

– Dette har skjedd i alvorlege saker som dels er av stor og offentleg interesse for vårt distrikt, skriv rådet i ein uttale som Hordaland Folkeblad har gjengitt.

Hardangerrådet er ei samanslutning av dei fire kommunane i Hardanger; Ullensvang kommune, Eidfjord kommune, Ulvik herad og Kvam herad

– Ei gjenoppretting må gjerne innebera ei styrking ved at kommunar som grenser til, som Voss, Samnanger og Kvinnherad, vert innlema for å gjere tingrettane meir like i storleik, skriv rådet i uttalen.

Ifylgje innspelet er lokal leiing og sorenskrivar den einaste garantien for at saker vert handsama lokalt og for at ein har juridisk kompetanse i distriktet.

– På bakgrunn erfaringar det siste året er det opplagt at Hordaland tingrett må delast for å sikra og styrkja rettstryggleiken i rettskrins Hardanger. Hardangerrådet forventar med bakgrunn i dei klare lovnadene frå valkampen og i Hurdalsplattforma at Hordaland tingrett vert delt. Det er frå Hardangerrådet si side konstatert at dagens løysing er korkje god eller framtidsretta for vår region, og på denne bakgrunn held ein fast på kravet om at Hardanger tingrett og Bergen tingrett får gjenoppstå som eigne tingrettar, understrekar Hardangerrådet i uttalen.