Vil ha Kvinnherad med i Hordfast AS

Når formannskapet stiller til møte torsdag ettermiddag, skal dei truleg diskutera eventuelt kjøp av aksjar i Hordfast AS. I alle fall ligg det føre ein invitasjon frå selskapet.

«I dag er åtte kommunar og fem næringsforeiningar frå vår region medeigarar. Sjølve drifta av Hordfast AS har sidan 2010 vore finansiert av bedrifter frå vår landsdel. Vi ønskjer no også Kvinnherad kommune inn som aksjonær i selskapet som ein stor og viktig kommune i vår region», skriv dagleg leiar Øyvind Halleraker.

Han opplyser vidare at Hordfast AS vart etablert attende i 2010, men fyrst kom i aktiv drift i 2017. I starten var NHO einaste aksjonær. Dei har no tilbakeført sine aksjar til selskapet, grunngjeve med at dei ikkje ynskjer å sitja på eigarposisjonar utover eiga intern verksemd.

Hordfast AS har vedteke å fortsetja drifta med dagens aktivitetsnivå fram til prosjektet er vedteke i Stortinget.

Energisparande

«Hordfast er av våre eigarkommunar heldt fram som regionens viktigaste prosjekt, dersom vi skal lykkast i den store omstillinga vi står framfor i næringslivet vårt og dermed i kommunane. Vi reknar derfor med at det også vil vera i Kvinnherad kommune si interesse at trykket i arbeidet vert halde oppe, og er overtydd om at eit kontinuerleg kommunikasjonsarbeid og nettverksarbeid er nødvendig for å nå våre mål», heiter det i brevet.

Halleraker trekkjer fram fleire argument om kvifor det er fornuftig å støtta selskapet. Deriblant at det er viktig for Bergen og Vestlandet, og at det er det mest lønsame, mest energisparande og klimavennlege vegprosjektet i Norge. Han hevdar også at Hordfast, altså brua over Bjørnafjorden, blir eit avgjerande bidrag for å sikra konkurransedyktig mobilitet og kompetanse til næringslivet i samband med omstilling og det grøne skiftet.

«Vi må stadig minna om at prosjektet vil opna for heilt nye bu- og arbeidsmarknader og regionforstørring, og som saman med Rogfast vil styrka Vestlandet si konkurransekraft betydeleg», skriv Øyvind Halleraker.

Snart ferdig

Arbeidet med reguleringsplanen for Hordfast nærmar seg ferdigstilling, og skal ut på høyring allereie no i vår. Seinast i haust sa eit stort fleirtal på Stortinget nei til eit forslag frå MDG om å stoppa prosjektet.

I innstillinga frå kommunedirektøren står det at eit eventuelt aksjekjøp må utgreiast nærare, men at ei slik vurdering fyrst bør skje i samband med at kommunestyret i vår/sommar skal vedta ny eigarskapsmelding. Øyvind Halleraker tilbyr seg uansett å møta lokalpolitikarane for å informera meir om prosjektet og selskapet.