Vil ha innspel frå kvinnheringar
Ordførar Vegard Bjørnevik håpar at Skyss vil høyra på innspel frå Kvinnherad når dei skal ut med nye anbod og ruter til ferjetrafikken.
– Alle som har konkrete tilbakemeldingar eller innspel om ferjerutene, kan senda dette på epost til kommunen, så skal me ta det vidare til Skyss, seier Bjørnevik på telefon til Grenda.
Skyss held no på med å utarbeida anbod for ferjetilbodet frå 2030. Ordføraren meiner at innspel som kjem inn tidleg i prosessen har større sjans for å bli høyrte. Tidlegare har ein opplevd at ynskje frå Kvinnherad ikkje har blitt teke omsyn til, men Bjørnevik håpar på betre utfall denne gongen.
Annonse
Sjanse til å påverka
– Det er no me har ein sjanse til å påverka, når anboda skal ut. Sist gong me var i samtalar med Skyss, var det mykje uvisse rundt overgangen til el-ferjer. No har me gode erfaringar med dei nye el-ferjene, og kan byggja vidare på dei erfaringane. Eg trur det kan gjera det lettare å få gjennom forslag då, seier Bjørnevik.
Han understrekar samstundes at det er dei nye el-ferjene som har fungert bra, og ikkje den ombygde ferja «Lærdal» som har hatt for store utfordringar i sambandet til Varaldsøy. No har ordføraren bede administrasjonen om å samla opp kva tilbakemeldingar om ferjetrafikken som har blitt registrert den siste tida. Men han håpar også å få inn ynske frå folk flest.
– Me vil jo oppretthalda, og helst betra, det ferjetilbodet me har her. Alle innspel vert mottekne med takk, seier ordføraren.
