Vil ha fyrverkeriforbod: – Bør vera eit tankekors for kommunane før nyttårsfeiringa

For mange er nyttårsfeiring og fyrverkeri einstydande, men for Dyrebeskyttelsen Norge er feiringa òg synonymt med skadar, redde dyr og forsøpling.

I ei pressemelding skriv organisasjonen at dette er årsaka til at dei, saman med fleire andre organisasjonar, bedrifter og fagpersonar, har bede Stortinget om å forby fyrverkeri for privatpersonar.

Fellesfeiring

Oppropet ber òg om at kvar kommune utarbeidar ein plan for felles markering av årsskiftet.

– Over 55.000 menneske har allereie signert eit krav om forbod inne på kampanjen si nettside, uttalar dei.

Ei undersøking utført av NITO i fjor viste at heile 65 prosent er heilt einige, eller noko einige i at det er rett å forby privat fyrverkeri på den siste dagen av året.

Mindreårige

Lovverket tillet i dag privatpersonar å fyra opp fyrverkeri mellom klokka 18 nyttårsaftan, og klokka 02 første nyttårsdag. Likevel er det mange som ikkje bryr seg om desse klokkesletta, meiner Dyrebeskyttelsen.

– Dette skapar utfordringar for menneske og dyreeigarar som prøver å beskytta seg, seier dei.

Dei peikar vidare på at ulovleg bruk av fyrverkeri, utført av mindreårige, er eit omfattande problem i heile landet.

– Over 50 skular, som vi har undersøkt via Retrievers medieovervåkingsvektøy, har hatt minst eitt tilfelle av fyrverkeri i skulen sine lokale i 2024. I tre av desse tilfella har elevar og éin lærar fått høyrselsskadar.

Augeskadar og brann

Seksjonsoverlege Nils Bull ved augeavdelinga på Haukeland sjukehus har registrert over 250 alvorlege augeskadar dei siste 18 åra på grunn av fyrverkeri. Mange får permanente skadar.

Direktoratet for samfunnstryggleik og beredskap (DSB) rapporterte om 127 uønska hendingar med fyrverkeri under feiringa i fjor. Av dette var det 37 personskadar, der den yngste var i treårsalderen. I tillegg har Brann- og redningsvesenet rapportert inn 196 branntilløp til DSB dei siste seks åra.

Dyrebeskyttelsen peikar vidare på at fyrverkeri er ei stor påkjenning for både tamme og ville dyr. I samband med nyttårsfeiringa 2021/2022, endte 80 hundar på rømmen som følgje av frykt for fyrverkeri, melder organisasjonen, som legg til at søppel etter gamle fyrverkeri er skadeleg for natur og ville dyr.

Eit anna argument Dyrebeskyttelsen brukar, er at fyrverkeria kan vera ei stor påkjenning også for menneske, som har opplevd krig, vald eller andre traumatiske hendingar.

– Norge har tatt imot mange flyktningar frå Ukraina dei siste åra, og dette bør vera eit tankekors for kommunane før nyttårsfeiringa, heiter det.