Vil ha busskur til ungane - er ikkje plass i budsjettet

Engasjert mor Silje Kvamsdal Guddal skreiv eit ope brev til Kvinnherad kommune om busskur 29. august 2023.

«Vi er så heldige at vi har eit busstopp nedfor Seglemsvegen på Seimsfoss, retning Husnes. Dette er det einaste busstoppet frå gamle Seglem skule til Rosendalstunet der det ikkje er busskur. Her står det ungdommar som har velt vidaregåande skule på Husnes som kvar morgon blir klissvåte», heiter det i brevet.

Guddal skriv vidare at ho håpar at det kan koma eit busskur på plass, og legg ved bilde som visar at det ser ut som om det allereie er laga til for eit busskur på nedsida av autovernet.

Etter å ha purra får ho svar frå kommunen om at dei sender saka vidare til fylkeskommunen og ber dei om å handsama saka raskt.

Fylkeskommunen sendte svar i desember 2023. Her kan vi lesa at dei ser at det er behov, men at dei har mange slike søknader inne.

«Fylkeskommunen har avgrensa med midlar til slike tiltak og må difor vurdera og prioritera dei opp mot kvarandre. Slike prioriteringar vert gjort i samråd med Skyss, som hentar ut data på kor mange som har rett på skuleskyss frå dei ulike haldeplassane. I utgangspunktet blir haldeplass der det er mange påstigande skuleelevar prioritert framføre haldeplassar med færre påstigingar» står det i svarbrevet.

Kommunen sender også brev til Guddal der det står at «Vestland fylkeskommune tek ikkje stilling til om det er aktuelt å setja opp busskur på staden i denne omgang. Vi får tru det blir ei løysing».

– Det var eit veldig vagt og halvvegs svar. Ein kjenner seg absolutt ikkje sett. Eit busskur hadde gjort at ein kjente seg litt meir verdsett, seier Guddal, og legg til;

– Det er ein god del som brukar busstoppet. Det er fira skuleelevar som står der kvar dag, og det er fleire som skal reisa utover på handling og slikt. Vi har 16 barn berre på Seglem/Skeie som skal med buss mot Husnes dei komande åra.

Guddal bad om ei ny vurdering då svaret ho fekk var alt for diffust. Terje Natland i Kvinnherad kommune skriv i eit svar at han er einig, men at fylkeskommunen er vegeigar og difor er det dei som står for slikt.

«Eg les svaret som byrja på eit ja til busskur. Vi må berre gå ein anna veg for å få det til», skriv han.

Etter fleire purringar og brev til både Kvinnherad kommune og Vestland fylkeskommune svara fylkeskommunen i mai i år at det ikkje berre er å setje opp eit busskur, men fleire ting som må på plass.

«Her må vi truleg søkja kommunen om dispensasjon for å byggja ny gangkryssing og fortau og ny haldeplass med skur. Det står uansett att å sjå om vi får finansiering til prosjektet», kan vi lesa i svarbrevet.

– Fotgjengarovergang burde det vera uansett. Ungane må springa over vegen både til og frå bussen, og veldig få bilar stoppar her. Men fortau og haldeplass er her allereie, og som sagt ser det ut som om det er laga til plass til å setje eit skur her, fortel ei oppgitt Guddal.

Fleire faktorar speler inn

Senioringeniør for vegforvaltning, infrastruktur og veg i Vestland Fylkeskommune Ståle Furnes fortel at fylkeskommunen får inn mange søknadar om skur.

– Vi har jamlege møter med Skyss, der vi får data som seier kor mange som nytter seg av kvar haldeplass, og kor mange av dei som er elever med rett på skuleskyss, fortel han.

Talet elevar som brukar eit busstopp er ein viktig faktor når fylkeskommunen skal prioritera kven som får busskur.

– Kor mange påstigande som er elevar med rett på skuletransport veg høgt når vi skal behandla desse søknadene. Om det er mange førsteklassingar veg det litt høgare, vi har ein eigen vurderingsmal, seier Furnes.

Men det er også andre ting som speler inn når fylkeskommunen handsamer søknadene om busskur.

– Stadlege forhold har ein del å seie. For å hindra påkøyrsle av skuret må det stå oppå betong eller liknande. Må vi opparbeida fortau, perrong, innkøyrsle til buss vert det naturlegvis meir arbeid og må vurderast opp mot kor mange som får nytte av det, seier Furnes.

Medan Grenda snakkar med Furnes sjekkar han kartet og ser at det er såkalla perrong på haldeplassen som heiter Segleimskrysset.

– Det er ein perrong her, men den ser noko smal ut. Dette må vi sjå nærmare på, seier han.

Kan setta det opp sjølve

Guddal skreiv i eit av breva at mannen Torgeir kunne setta opp busskuret om kommune eller fylkeskommune haldt materialane.

– På baksida av autovernet ved stoppet ser det ut til å vera lagt opp til at det skal kome busskur. Det einaste ein treng er vel å setta det opp, og det tilbyr vi oss å hjelpa med, seier ho.

På dei dagane det ikkje bles men berre regner tek ungane med seg paraply. Den stuer dei inn i hekken til ein nabo før dei går på bussen.

– Eg spurte om eg kunne få vedtak på paraplystativ, men det svara dei ikkje på, ler Silje.

– Med tanke på at kommunen vil at folk skal ta meir kollektivtransport burde det vera grei skuring. Kor mykje kan det kosta med eit busskur?, legg ho til.

Etter litt søking på nett finn Grenda at busskur kan kosta frå 70.000 kroner og oppover. Eit vi fann kosta over ein million, men bebuarane på Seglem klarar seg kanskje utan arkitektteikna venteskur.

– Ungane treng ly frå regn og vind. Bles det veldig blir dei kalde og våte uansett, men det burde vera eit minstekrav for busskur på Vestlandet, seier Guddal.